Beste leser
2010-03-06 22:50
- Artikelopsies
- Deel
- Kry Rapport op
Ná die akteur River Phoenix se dood op 23 aan ’n oordosis buite Johnny Depp se Viper Room-nagklub in Los Angeles, het sy vriend, die akteur en skrywer Ethan Hawke, gesê dis jammer River het nie meer klassieke boeke gelees nie: “Because then he would’ve known his weirdness is not unique.”
Ek stem heelhartig saam. My neef is self heeltemal te vroeg aan ’n oordosis oorlede en soos Hawke wens ek ook hy het meer gelees, want as jy en die regte boek op die regte oomblik ontmoet, kan jy nie anders as om te besef dat jy nie werklik alleen met jou onstuimige gemoed en vertwyfeling is nie.
Vir my was J.D. Salinger se The Catcher in the Ryeso ’n boek. My ma het dit vir my gegee net voor die standerd 8-eindeksamen. Ek was 16, nes Holden Caulfield in die boek, en ek was ook moeilik. En juis daarom het ek gedog dit gaan een van daardie “jeugboeke” wees wat om ’n uitgediende sedeprekie gebou is. Die enigste rede hoekom ek dit hoegenaamd begin lees het, was om met my ma te stry daaroor. Maar Holden Caulfield het my lewe binnegeval soos die Beatles en die Rolling Stones Amerika in die ’60’s.
Om jonk en deurmekaar te wees, sê Nick Hornby in The Complete Polysyllabic Spree, is ’n tema so wyd dat g’n skrywer dit sy eie kan noem nie. En tog, meen Hornby, voel ’n mens Salinger besit die kopiereg daarop.
Maar Holden Caulfield spreek nie net tot jeugdiges nie – hy praat vir elkeen wat al gebrand het om in die middel van die nag uit sy/haar lewe weg te hardloop; vir almal wat g’n idee het wie hulle is of waar hulle ooit gaan inpas nie; vir elkeen wat die vrede wantrou en liewer gif sal skink as om te verander in een van die wêreld se “phony bastards”.
In hierdie uitgawe bring ons hulde aan Salinger, wat toe wel nooit ingepas of aangepas het nie en op 27 Januarie vanjaar as eksentrieke kluisenaar oorlede is (sien bl.3 en bl. 16). Ons besing ook ’n rits ander boeke wat dalk net jou of iemand na aan jou se lewe kan red, of ten minste deeglik kan verhelder.
Moenie die volgende misloop nie:
-Kerneels Breytenbach se skreeusnaakse V&A met Tannie Evita Bezuidenhout oor dié se nuwe kosboek (bl. 4)
-Elmari Rautenbach se gesprek met Maya Fowler oor haar opwindend debuutroman (bl. 5)
- Eben Venter kuier in Sydney by die bekroonde skrywer David Malouf (bl. 8-9)
- Hester Carstens se onderhoud met die gewilde Barbara Kingsolver (bl. 10) oor haar jongste roman
- Desmond Painter se gesprek met Fanie Olivier oor sy eerste digbundel in 21 jaar (bl. 13)
Geniet dit
Danie
- Rapport