Beste leser

Abraham H. (Braam) de Vries het seker geen bekendstelling nodig nie.

Hy, het John Kannemeyer op ’n keer gesê, “lewer sy eie besondere bydrae tot Sestig en is die eerste beoefenaar in Afrikaans van ’n tipe kortverhaal wat nie altyd op die eerste sig sy betekenis ondubbelsinnig uitsê nie.
“Ook stilisties toon sy werk ’n suiwerheid en verfyning wat deur min van sy generasiegenote oortref woord.”

In dié uitgawe bring Hans Ester hulde aan Braam de Vries, die skrywer en mens, wat 9 Februarie verjaar.

Dis Februarie, en sommige mense vier dit as die maand van liefde. In dié maand vra Ilse Salzwedel ’n paar skrywers van romantiese fiksie: Hoe lyk jul perfekte man? Lees op bl. 6 meer hieroor.

Bl. 7 is op versoek van lesers wat telefonies en per e-pos gevra het: Skryf asseblief ’n slag oor Sarah du Pisanie. Nou ja, menere, hier is sy. En sy sê: “Alles op aarde gaan oor die liefde.”

Wat ’n jammerte, skryf Loftus Marais op bl.?4, dat Alice Oswald nie ’n groter aanhang buite Brittanje het nie. Dié veelbekroonde digter, meen hy, is verfrissend toeganklik, haar ritmes bedwelmend.

Soos krummels op ’n straatkafee se tafeldoeke kan Johann de Lange se Weerlig van die ongeloof die duiwe van jou gedagtes besig hou, meen Hans Pienaar (bl. 5). En op dieselfde bladsy bepleit Joan Hambidge groter respek vir die digter Charl J.F. Cilliers.

Geen meer gepaste tyd as nou om te werk aan ’n beter wêreld, ’n beter gemeenskap en beter mens wees nie. Sommige (bl. 8) meen evolusie kan help om van die wêreld ’n beter plek te maak, terwyl Andeline Pretorius-Williams (bl. 9) empatie met ander vir dié doel predik.

Maar dalk leer ons meer oor mens- wees en mensheid uit sprokies? Lees op bl. 9 wat Cas van Rensburg hieroor te sê het.

Kan sy asseblief boeke in ’n reeks vir meisies met haar sakgeld afbetaal? skryf ’n 16-jarige meisiekind verlede jaar aan ’n uitgewer.

Natuurlik nie, antwoord die uitgewer, ons skenk dit en sommer nog ’n paar boeke aan jou. Leesgierigheid... Ontmoet Bonnievale se eie Boekwurm op bl. 10.

En dan praat ons weer op 4 Maart.

Anastasia