Beste leser

Op die voorblad van Rapport Boeke is ’n kunswerk met die naam Voetsoolvlakdemokrasie: menseregte deur Evette Weyers, internasionaal bekende beeldhouer wat nou ook ’n boek geskryf het.

Kuns, sê dié kunstenaar op bl. 3, behoort ons te herinner aan ons gedeelde menslikheid en ideale; ook en veral die ideale soos dit in ons (bedreigde?) Grondwet verskans is.

Op bl. 4 maak jy kennis met Speurhond Willem en Anna Atoom se “ma”. Anna Atoom, sê die 12-jarige Zak Retief, is nogal cool vir ’n meisie.

Weet jy wat die tandmuis se naam is? En waar hy bly? Alles oor dié muis word op bl. 5 onthul.

Gaan lees op bl. 6 en bl. 7 die werk wat drie voorste Afrikaanse skrywers gepubliseer het toe hulle in matriek was – 1972 was ’n jaar vol belofte.

Seks is inderdaad uit die kas in die beskrywing van ’n paar erotiese tonele in Mêrie Scheepers se Dryfhout en opdrifsels, skryf Cas van Rensburg op bl. 8. Maar daar is meer aan dié boek as seks, en aan die skrywer, wat alte graag “boer-boer speel”.

Op bl. 9 is Auma Obama aan die woord oor haar halfbroer, pres. Barack Obama, en oor hul pa, Afrika, vroueregte en haar boek, And Then Life Happens.

Amanda de Lange, joernalis, het twee boeke deur twee verskillende skrywers gelees waarin ’n joernalis die hoofkarakter is. Lees op bl. 10 of sy haar in dié karakters kon herken.

Fifty Shades of Grey deur E.L. James – sommige noem dié eerste boek in ’n trilogie ’n erotiese roman, ander pure pornografie – is ’n wegholsukses. Sowat 200 000 eksemplare van dié boek is in een week verkoop. Ook in Suid-Afrika is dit op die topverkoperlyste. Hoe nou gemaak met romanses? Kyk op bl. 12.

Rosemaré Moolman van Bellville, Deon Cloete van Oudtshoorn en Betsie Terblanche van Sasolburg moet gerus die pos dophou. Julle is die wenners van die uitgewer Penguin se Vadersdag-geskenkboeke.

Loraine Bosch van Despatch, jou vrolike koevert met plakkertjies het ’n vaal dag in Johannesburg vol kleurspatsels en pers Barney-drukkies gemaak.

’n Pakkie boeke om dankie te sê vir dié prettigheid is ook na jou toe op pad.

Gegroet!
Anastasia