Brief van die Boeke-redakteur

Vandeesmaand reis ons weer woordlangs, eers saam met Karel Schoeman na Nederland in sy jongste boek, Riviereiland.

Jaap Goedegebuure vertel hoe einste dié boek hom dinge in sy vaderland laat raaksien het wat gewoonlik sommer so sienderoë by hom verbygaan. Maar is Schoeman se Nederland die Nederland van ’n Goedegebuure? Lees meer op bl. 3.

En wie beter as Dana Snyman as reisgenoot op ’n soort walkabout deur die geliefde land op soek na wie jy is?

Sy nuwe boek, Hiervandaan, is nié bloot ’n romantiese verlange na die verlede nie, sê hy op bl. 4. Want die verlede was nie beter as nou nie, maar soms is dit nodig om terug te kyk.

En saam met Michael Ondaatje loop ons die pad na sy weerlose jare as jong seun. En teen die einde van die boek, meen Herman Lategan (bl. 5), sal jy voel jy het iets ver verby die grense van jou eie lewe ervaar.

Op bl. 10 is ons plots in China, ’n China waaraan selfs China nie graag herinner wil word nie. Marius Visser vertel hier van ’n boek wat geen uitgewer in dié land wou uitgee nie.

As die roman die rockster onder literêre genres is, wat dan van die kortverhaal? Gaan lees gerus meer hieroor op bl. 6 en bl. 7.

Op die agterblad gee die liewe Reta Smit leiding oor hoe ’n mens praat oor die wenner van sê nou maar die Nobelprys. Natuurlik weet ons almal wie Tomas Tranströmer is en kén ons sy werk.

Vonkfiksie, vonfiksie... kan ons vir ons Kersuitgawe seblieftog ook vroliker kortkortverhale kry? Stories van hoop, blye tydings, vreugde, wonderwerke – dis immers Kerstyd.

Laat ons dan ook boeke skenk, soos die uitgewer Struik wat ter viering van sy 50ste verjaardag lesers die kans bied om ’n pak van 50 boeke te wen. Klik op http://www.randomstruik.co.za/struik-50th.php om deel te neem.

Ons praat volgende maand weer.

Anastasia