Daddy’s Girl
2010-03-06 22:50
- Artikelopsies
- Deel
- Kry Rapport op
Mapstieks meisie, maar jy’t my laat naels kou!
Margie Orford se derde boek, waarin die raakvat-joernalis dr. Clare Hart verskyn, sny byna te na aan die been.
Die storie, soos die titel skimp, fokus op die verdwyning van jong meisies, meestal in die bende-geteisterde Kaapse Vlakte. Enige iemand wat gereeld na die sewe-uur-nuus kyk, het genoeg opgegaarde beelde van vermiste- kleinmeisiejie-skoolfoto’s, om Daddy’s Girlte sien as fiksie wat die werklikheid weerspieël.
Wanneer klein Yasmin buite haar dansklas verdwyn, word haar pa die hoofverdagte in die ontvoering. Kaptein Riedwaan Faizal – wat die leser reeds in Orford se vorige boek, Blood Rose(2007), ontmoet het – vervul dus sowel die rol van die angstige pa van Yasmin, asook lid van die legendariese Kaapse Bende-eenheid. Sy rol as vervolger verander egter na vervolgde wanneer die hoof van die polisie hom wil aanhou vir ondervraging. Met die hulp van een of twee kollegas blyk hy die boeie vry te spring en besef hy gou sy enigste hulp is die joernalis Clare Hart, wat aan ’n TV-reeks oor vermiste meisies gewerk het.
Orford stel die verskeie karakters vroeg aan die leser bekend en gou weet jy nie wie om te vertrou nie. Ou vriende bly nie noodwendig beste vriende in die geveg nie. Tyd word amper sy eie karakter, soos die ure afgetel word om Yasmin lewendig op te spoor.
Orford bou ’n eenvoudige, dog doeltreffende verhoog en laat dan haar hoofkarakters toe om die gehoor saam te sleep deur donker parkeerterreine met halwe leidrade. Sy gebruik die taal van geweld soos iemand wat lank in die land is en weef dit mooi deur die bekende Kaapse strate en gebiede om jou onrustig te laat lees. Dit is juis die feit dat ons in ’n land van misdaad en grusaamhede bly wat Daddy’s Girl soms ongemaklik maak. Korrupsie in die polisie, sinnelose moord, bende-gevegte – dis soos ’n episode van Special Assignment sonder die tema-musiek. Dié wat ons glo ons sal beskerm, steek ons dalk in die rug.
Aanhangers van die Clare Hart-reeks gaan beslis nie teleurgesteld wees nie, sy bly die sensuele, intelligente joernalis met net genoeg ‘Hart’ om mens te wees. Margie Orford is nie verniet een van Suid-Afrika se voorste speurskrywers nie. Sy skryf ontsnappingsromans, maar dit wat maklik lees, verteer nie noodwendig vinnig in die gemoed nie.
Daddy’s Girl
Margie Orford
Uitgewer: Jonathan Ball Publishers
Prys: R175
Resensent: Verushka Louw
- Rapport