Immer aan’t verken, reis op smalle weë
2011-11-05 13:18
- Artikelopsies
- Deel
- Kry Rapport op
Oepse daisy deur Johan Bakkes. Uitgewer: Queillerie. Prys: 170 (Bestel hier)
Van Johan Bakkes het die reisbundels Moer toe die vreemde in, Nou’s ons in ons donner in, Norrevøk en Samoe(r)sa reis al verskyn en nog is hy op pad. Dis glo van grootword op Saldanhabaai aan die Weskus dat hy so lief is vir avontuur, reis en die natuur.
En nou pas verskyn nog ’n bundel, Oepse daisy, wat net sowel “O bliksem”, “O gits” of “O magtag” kon gewees het, sê die skrywer wat as geoktrooieerde rekenmeester en ouditeur opgelei en nou verbonde is aan die Universiteit van Wes-Kaapland. Iewers in die Paarl sal jy sy huis vind.
En hom dalk op ander paaie teëkom, maar weet ook: Die maklik begaanbare weë hou vir hom geen bekoring in nie. Vir hom altyd maar die smalle weë wat met bloedsweet gepaardgaan. Dáár waar min ander dit nog gewaag het.
En met “oepse daisy”, eerder as ’n kragwoord, is dit miskien tyd om Juanita du Plessis pleks van Jack Parow te speel, skryf hy in sy voorwoord.
Die titelverhaal dui immers op een van die skrywer se heel moeilikste reise – om kolonkanker te oorwin. In sy boek is oudergewoonte heerlike, avontuurlustige vertellings oor ver én naby reise, propvol humor. Maar nooit sonder deernis vir die medemens nie.
Dit gaan hier oor die sielsdinge van reis en verken, veel eerder as die plek en die pad daarheen. Die reis bly die tema, maar die ouderdom, erken hy, maak dat melancholie en nostalgie sy kop uitsteek.
Anderkant omdraai deur Jan van Tonder. Uitgewer: Protea Boekhuis. Prys: R140 (Bestel hier)
’n Dominee wat nie kan ophou pruim nie. ’n Wegholbruid. Pres. Paul Kruger se padwoede en ’n Boerekryger wat deur ’n haai doodgebyt is.
Dié stories kry ’n mens in Jan van Tonder (skrywer van onder meer Roepman, waarop ’n gelyknamige rolprent gegrond is) se Anderkant omdraai, ’n versameling kort-kortverhale, essays, sketse en anekdotes.
’n Heerlike leeservaring wat wissel van die humoristiese tot die melancholiese, die stuitige tot die diepsinnige. Verwag om te lag én om geroer te word.
Van Tonder skryf oor die ou Suid-Afrika en die nuwe een, oor die wonder van onskuld en oor ouer word.
“Dat soveel temas en toonaarde binne die beperking van ’n koerantrubriek oortuigend en boeiend gestalte kon kry, is ’n ware kragtoer,” skryf Daniel Hugo op die agterflap van die bundel.