Snaakse land, snaakse mense
2011-02-08 14:03
- Artikelopsies
- Deel
- Kry Rapport op
Die sommelier -- GP Terblanche
Uitgewer: Rosslyn-Pers Prys: R140
Jy kan nie oor die donker kant van spioenasie in Suid-Afrika skryf sonder om aan die misdadige hart van ons land te raak nie.
Dis die één element waar Suid-Afrikaanse spanningskrywers van hul skryfgenote in ander lande verskil. As jy ’n storie skryf oor die misdadige, korrupte en politieke sy van Suid-Afrika en jou leser is Suid-Afrikaans, gaan dit gelees word as sosiale kommentaar.
Die interessantheid hiervan is dat dit dikwels teen so ’n boek kan tel. As jy ’n spanningsverhaal lees, wil jy daardeur meegesleur word – en nie heeltyd voel jou aandag word afgetrek deur ’n sosiale skuldgevoel of politieke kommentaar nie.
GP Terblanche se boek speel af in plaaslike omgewings en met karakters wat ons maar te goed ken. En ja, dit lewer kommentaar – maar eerder so dat dit bydra tot die boek en nie afbreuk daaraan doen nie.
Om Terblanche se boek te lees is soos een van daardie miljoen-stuk-legkaarte wat ’n mens weke vat om aanmekaar te las. Aan die begin is daar so baie karakters wat jy moet leer ken jou kop is skoon deurmekaar. En dan is daar al die verskillende storielyne wat gevolg moet word.
Vir my was die pas aan die begin te stadig, maar dit tel wel op. En as die legkaartstukke stadig maar seker in mekaar begin pas, kan jy die boek nie neersit nie.
Die hoofkarakters is Lev Engelbrecht, wat sommelier speel by ’n luukse wild-ontvlugtingsoord, maar wat dieper geheime het as blote wynkennis.
Dan is daar die spioen Oosterbeek, wie se lewe gewy is aan spioenasie, en die vrou wat Lev teruglok in die wêreld van intrige en dood – Jane Turnbull.
Die spioenasieverhaal is sterk op feite gegrond en Terblanche se meestersgraad in politieke wetenskap en ervaring in intelligensiewerk, asook sy wynkennis, skemer sterk deur en help om die storielyn interessant en realisties te hou.
Hy voer jou weg na ’n grootwildwêreld waar die diere groot en manne wild is. Hy stel jou voor aan die delikate geheime van wyn en dis nie aldag dat ’n mens ’n spanningsverhaal lees wat jou wynkennis sommer ook kan opknap nie.
Sy karakters is lewensgetrou en die spioenasie-intriges fassinerend. Op die ou end het die plaaslike inslag vir my die deurslag gegee en gemaak dat ek baie meer van die boek hou.
En ja, die sosiale kommentaar was daar, hier uit die mond van Jane Turnbull: “Sy verstaan ook nie die Suid-Afrikaners nie. Snaakse land. Snaakse mense. Hulle sit seker ook maar met te veel bagasie uit die verlede. Hulle sê die samelewing is nou nie-rassig, maar ook nie. Daar is nie meer diskriminasie nie, maar ook nou eintlik nie rasse-eenheid nie. ’n Land wat verdeeld bly.”