Vermoorde se vrou eis R7,5 miljoen van polisie
2009-11-28 23:00
Willem Pelser
Die weduwee van ’n plaasbestuurder wat in 2007 in KwaZulu-Natal deur plaasbesetters vermoor is eis miljoene rande van die polisie weens “growwe nalatigheid en onbevoegdheid”.
Net een van ’n groep aanvallers is kort ná die moord op mnr. Ken Eva in hegtenis geneem hoewel daar letterlik honderde mense – ook polisielede – teenwoordig was toe dit gebeur het.
Die moord het plaasgevind tydens ’n vergadering wat gehou is oor die besetting van ’n deel van die plaas wat deur Eva bestuur is.
’n Geraamde 200 plaasbesetters, gemeenskapsleiers, verteenwoordigers van staatsdepartemente asook polisielede van Eshowe en Melmoth het die vergadering bygewoon.
Eva is deur ses aanvallers met knopkieries en kapmesse vermoor. Net een verdagte, mnr. Sipho Sha-ngwe, is in hegtenis geneem. Hy is egter die volgende dag vrygelaat nadat borgtog aan hom toegestaan is.
In ’n aanmaningsbrief van 28 bladsye wat Maandag aan die minister van polisie, mnr. Nathi Mthe-thwa gestuur is, eis mev. Priscilla Eva R7,5 miljoen vir onder meer “verlies aan inkomste, emosionele trauma en algemene skade”.
Sy eis ook toegang tot sekere polisiedokumente en dat die polisie die moord onmiddellik oplos.
Eva het aan Rapport gesê sy kan steeds nie haar man se dood verwerk nie, is “emosioneel uitgeput” en finansieel in ’n benarde situasie.
“Dis hoog tyd dat die polisie hul werk begin doen en my vergoed vir my groot verlies,” sê sy.
Haar prokureur, mnr. Jurgens Bekker van Bedfordview in Johannesburg, voer in die aanmaningsbrief aan die polisie was nalatig by die vergadering omdat geen poging aangewend is om die moord te keer nie.
Die moordtoneel is nie beveilig nie en niks is gedoen om te verhinder dat bewysstukke verwyder of vernietig word nie.
Ken Eva se familie het later ’n bebloede vingerafdruk op sy selfoon se battery gekry, maar die polisie het glo nie daarin belang gestel nie.
Die rede is moontlik dat lede van die plaaslike polisie ’n persoonlike belang het by die gronddispuut en duidelik simpatie het met die plaasbesetters, voer Bekker aan.
Die polisie het nog nie ’n verklaring afgeneem by een van die polisielede wat die vergadering bygewoon het of enige ander getuies nie, skryf Bekker.
Die ondersoekspan het ook nie die ongelukstoneel behoorlik forensies ondersoek, die nodige foto’s op die toneel geneem of ’n verslag opgestel oor bewysstukke wat gevind is nie.
’n Vrou wat bereid was om Eva se moordenaars uit te wys, me. Faneleni Mhlongo, is ook nooit ondervra nie en nie in ’n getuiebeskermingsprogram geplaas nie. Sy het intussen spoorloos verdwyn.
Bekker voer ook aan die polisie het geen poging aangewend om uit te vind wie telefoniese doodsdreigemente aan Eva gemaak het voor sy moord nie.
Die plaasbesetters maak aanspraak op ’n deel van die plaas omdat hulle glo dit behoort aan ’n plaaslike hoofman.
- Rapport