Haai. Meneer! Waarna kyk jy?
2010-02-06 23:12
’n Bankier is uitgevang dat hy na gewaagde foto’s op sy rekenaar kyk toe sy doen en late regstreeks op Australiese televisie uitgesaai is.
Die werknemer van Macquarie Private Wealth het na foto’s van die Australiese model Miranda Kerr gekyk, salig onbewus daarvan dat ’n kollega naby hom besig was met ’n regstreekse televisie-onderhoud oor die Australiese ekonomie.
Australië se Seven Network het die onderhoud Dinsdag uitgesaai, met die foto’s wat duidelik op die rekenaarskerm op die agtergrond te siene is. In ’n stadium het die man omgedraai, reguit in die televisiekamera gekyk en besef alles wat hy gedoen het, is opgeneem.
Die voorval het ’n internasionale treffer op YouTube geword, waar dit al meer as 200?000 keer gekyk is en vyf sterre gekry het.
Australiese koerante het Woensdag wyd daaroor berig.
Macquarie Bank, wat in Australië bekend staan as die “miljoenêrsfabriek”, het gesê hy beskou die saak in ’n ernstige lig.
“Macquarie het ’n streng beleid oor die gebruik van tegnologie en die kwessie rondom die regstreekse uitsending op Seven News kry intern aandag,” het die bank aan plaaslike media gesê. - Reuters
- Rapport