Die Nederlandse sanger Stef Bos noem hul musiek “waaragtig”, sang
sonder ’n masker, hart-en-siel-musiek.
Twee jaar gelede, toe hy die sanggroep Februarie-susters – die drie
bloedsusters Jane Filander, Maria Steenkamp en Debbie Isaacs en Maria se dogter,
Esmé Klaaste – die eerste keer in ’n Grabouwse kerkie gehoor het, was dié
“gospelmusiek, in die mooiste Afrikaans, ’n openbaring wat my aan die hart
geraak het. Dit het my ontroer, terselfdertyd laat lag. Dis wat waaragtige
musiek moet doen.”
Dit was op ’n Sondag, ná ’n vertoning in die amfiteater op die Paul
Cluver-wynlandgoed, dat hy op die ingewing van die oomblik besluit het om kerk
toe te gaan.
“Daar het ek dié vier hoor sing en gedink hoe lekker dit sou wees
om saam met hulle te sing, hul musiek in een van my vertonings te
integreer.”
Min het hy geweet dis ook die groep se droom: Om ’n CD te sny.
Volgens Esmé sing die drie susters al van hul kinderjare af saam –
op sangaande, begrafnisse, troues en partytjies. In die jare negentig het sy by
hulle aangesluit.
Die naam van die groep is gekies omdat drie van die vier in
Februarie verjaar.
’n Jaar nadat Bos en die susters mekaar ontmoet het, het hul wens
waar geword en het Bos ’n nuwe liedjie, “Gelukkig”, spesiaal
geskryf om saam met hulle uit te voer.
Dié liedjie, in ’n mengsel van Nederlands en Afrikaans, is opgeneem
op Stef se CD Kloofstraat, wat begin Maart uitgereik word.
“Alles het uiteindelik saamgekom,” sê Bos. “Van die eerste oomblik
dat ons saam opgetree het, het alles net eenvoudig gewérk.
“Later, toe ons dit in ’n ateljee op Stellenbosch opneem, was dit
vir my mooi dat hulle ook in professionele omstandighede bly wie hulle is: mense
wat sing met hart en siel, allesbehalwe kommersialiteit en Idols.”
Volgens Esmé is Bos se klank weer vir hulle besonders, “oor die
enkelnote wat hy speel?.?.?. die klank van sy klavier, sy rustige stem. Vir my
is sy liedjie ‘Rut’ die heel mooiste.”
In die musiekbedryf, sê Bos, sing baie mense “soos hulle sou wou
wees of soos hulle dink die gehoor dit wil hoor.
“Dis oukei, maar ek is liewer vir mense soos die Februaries wat
sing sonder masker. Hul ongepoleerde klank maak hul optrede baie meer outentiek.
Dis baie meer ontroerend.
“En veral wys dit vir my waaróm ook my eie musiek moet
draai.”
Daar is baie ware blues en soul in hul klank, sê Bos. “So iets kan
jy nie namaak of suggereer nie, al het jy tegnies ’n formidabele stem. Sommige
dinge in die lewe kan jy nie leer nie; jy moet dit lewe.
“Wanneer die Februaries oor iets sing, wéét jy hulle het dit
gelewe.
“Daar’s vir my ’n wonderlike verbintenis tussen die bruinmense van
die Kaap en ouens soos ek uit Holland. Hulle is onlosmaaklik deel van ons
geskiedenis; eintlik ’n vergete deel. Ons is familie van mekaar,” sê Bos.
;?Stef Bos en die Februarie-susters tree
op 1 en 5 Maart by die Woordfees op Stellenbosch op. Op 1 Maart bied hulle die
program Moedertaal aan (R100) en op 5 Maart is hulle deel van die
program Aan Tafel: Soete Groete (R170).
;?Bespreek by Computicket, www.
computicket.co.za of 0?083 915 8000.