Moenie bang wees nie, als sal regkom
2011-11-05 14:54
- Artikelopsies
- Deel
- Kry Rapport op
So baie mense kyk op na tannie Evita. Wie is jóú rolmodel?
Ek dink amper my ma, Ouma Ossewania Kakebenia Poggenpoel. Sy’s nou 107 jaar oud en baie moeilik. Ons bid maar vir ’n vinnige einde. Maar Mamma het altyd gesê: “Moenie bang wees nie; alles sal regkom.” Ons hoop so.
Jy is nooit bang om jou sê te sê nie. Is daar onderwerpe wat selfs vir jou taboe is?
Seks is altyd die grootste struikelblok. My kleinkinders vra my uit en ek weet nie wat om te vertel nie.
Hulle het ons mos destyds niks vertel nie. Net gesê: “Skat, lê stil met jou oë toe en bid. Ná nege maande sal jy ’n kind ontvang!” Nie so maklik nie ...
Dink jy mense sien jou as ’n moderne Robin Hood?
Liewe aarde, in daardie snaakse groen klere met aaklige hoed en snor? Nee wat, ek is net ek.
Wat dink jy van mans wat vroueklere dra?
Dis vieslik. Dis on-Afrikaans en naar. Maar in ’n demokrasie moet ’n mens maar alles vat soos dit kom.
Ek is bly ek ken niemand wat so liberaal is nie.
Glo jy in reïnkarnasie?
As ek eendag terugkom as ’n rottweiler sal ek jou byt en dan sal jy weet dis waar!
Wie is jou geliefkoosde Springbok-rugbyspeler en hoekom?
Joost (van der Westhuizen) was altyd my groot liefde en is dit steeds vandag, waar hy soveel bystand verdien.
Sal jy ooit botoks of ’n facelift laat doen?
Helen Zille het al die botoks opgebruik. En my face het nie lifts nodig nie – ek is nie ’n gebou nie!
Jy woon op Darling. As jy enige ander naam vir die dorp kon kies, wat sou dit wees?
“Skattie”! En kyk op GPS of Google Earth; in Darling sien jy die Evita Bezuidenhout-boulevard. Nie eens Winnie het een nie!
As jy ’n uitnodiging na Steve Hofmeyr se troue kry en jy gaan, wat sal jy aan die bruidspaar as geskenk gee?
’n Eenrigtingkaartjie na Hawaii.
Ken jy die woorde van Kurt Darren se liedjie Kaptein?
Nee, my skat, maar ek ken die woorde van Nkosi Sikelel’ iAfrika.
Jy het vroeër vanjaar die Special Teddy-toekenning op die Berlynse Internasionale Rolprentfees ontvang vir jou toewyding om MIV/vigs in Suid-Afrikaanse skole te help bekamp. Hoe belangrik is toekennings vir jou?
Daardie derderangse komediant Pieter-Dirk Uys het dit gekry. Moenie met ons deurmekaar raak nie.
Ek self probeer waar ek kan om ouers en oumas/oupas aan te moedig om met hul kinders te praat. Anders gaan ons hulle verloor.
Jy en jou suster, Bambi Kellerman, sit nie langs dieselfde vuur nie. Hoekom nie?
Want sy sal my sommer in daardie vuur stoot uit gulsigheid en naarheid. Sy laat my gril met haar liberale houding teenoor die lewe.
En haar outobiografie, Never Too Naked, wat nou in die winkels is, is skandelik. Ek gaan haar dagvaar!
Dink jy vryheid van spraak is belangrik?
Ek glo in vryheid van spraak. Dis natuurlik na spraak dat vryheid gaan. En ek is genooi om die voorsitter te word van die voorgestelde Mediatribunaal. Soos in die ou dae van PW se sensuur.
Dié is die laaste uitgawe van KaapRapport. Hoe sal jy die koerant onthou?
Ek sal julle mis.
Hoe wil jý eendag onthou word?
’n Liggie in die duisternis van verwagtings.
Waar en saam met wie bring jy Kersfees vanjaar deur?
Met my drie kleinkinders, my seun, De Kock, sy maat, Moff de Bruyn, en hopelik Mimi Coertse.
Wat is jou wens vir Wes-Kapenaars in 2012?
Moenie bang wees nie, alles sal regkom – en Patricia sal ’n muur om jul toilette bou!