Roerende gebedsketting op Upington-brug gehou
2011-10-29 15:29
’n Gebedsketting is dié week op die Upington-voetgangerbrug gehou vir almal wat al hier selfmoord gepleeg het.
In minder as drie maande het drie mense – twee tienermeisies en ’n man – van die voetbrug gespring en nog ’n man het van die verkeersbrug gespring.
Honderde mense, waaronder raadslede, geestelike leiers, polisie- en brandweerlede, het die gebedsgeleentheid bygewoon.
Mnr. Dirkie Claassen (32) was op 11 Oktober die vierde mens wat in die Oranjerivier na sy dood gespring het. Hy was ernstig siek en kon glo nie meer sy lyding hanteer nie.
Op 1 Augustus het Lizelle Draaier (16) en Ashley Andrews (15) saam na hul dood gespring en op 12 Augustus mnr. Gerrie Steenkamp (39), ’n werklose onderwyser van Loeriesfontein.
Me. Limikatso Koloi, burgemeester van die //Khara Hais-munisipaliteit, het aan KaapRapport gesê die munisipaliteit bespreek tans maatreëls om die brug te beveilig, “maar ons moet begin deur die moraal van die mense te verbeter.
“In die toekoms sal nog sodanige dae gehou word, ook om oor ander probleme te bid.”
Sy het ’n ernstige beroep op die gemeenskap gedoen om te bid.
“Ons moet onder geen illusie wees dat selfmoord nie met jóú kind kan gebeur nie, want net môre kan dit jou familie raak.
“Die Oranjerivier is ons lewensaar. Water is ’n teken van ons lewe, nie van dood nie.”
Sy het ook na die polisie se duikeenheid verwys. “As ek soggens en saans hier oor die brug gery het, het ek hulle in swempakke gesien, besig om te soek.
“Hulle werk lang ure sonder ekstra vergoeding. Gee hulle die erkenning wat hulle toekom.”
Die groot groep het in die middel van die brug ’n gebedsketting gevorm, gevolg deur die roerende gesing van geestelike liedere.
Emosies het hoog geloop terwyl luide smeekgebede na die “Lam van God” uitgeroep is dat Hy die seer van die gemeenskap heel.
* Intussen het ’n 20-jarige man Woensdag vlugtig in die hof op Upington verskyn op ’n aanklag van verkragting.
Dit hou verband met die gebeure op 1 Augustus, toe ’n ooglopend wankelrige en moontlik bedwelmde Lizelle en Ashley hul voorarms met ’n serp aanmekaar gebind en van die brug gespring het. Die tienerlyke is eers op 12 Augustus gevind.
Die klaer in die verkragtingsaak is ’n minderjarige vriendin wat die vorige aand saam met Lizelle en Ashley en minstens twee mans op die Eiland-vakansieoord gekuier het. Dwelms en drank is glo dié aand gebruik.
Die beskuldigde se naam mag nog nie bekend gemaak word nie aangesien hy nog nie op die aanklag gepleit het nie. Hy is uit op borgtog en moet weer op 9 November in die hof verskyn.