Rokkies wou sy dra
2010-02-27 16:18
Carryn-Ann Nel in Kaapstad
cnel@rapport.co.za
Vir vier dae het die Wes-Kaapse premier elke oggend om 06:30 ’n jong man in haar huis ontmoet. Dan is daar aan Helen Zille gemeet?en gepas?.?.?.
Maar dit was darem alles ten bate van liefdadigheid.
’n Pragtige rok is binne vier dae deur Hendrik Vermeulen (27) van Hendrik Vermeulen Couturier in Westlake gemaak.
Dié rok is geskep om te help geld insamel vir die nie-regeringsorganisasie My Life, wat straatbewoners na ’n beter lewe help. Twee rokke deur die ontwerper Devon Anderson is gedra deur onderskeidelik dr. Annelie Rabie, besturende direkteur van Business Against Crime: Wes-Kaap, en me. Liesl Göttert, pres. Jacob Zuma se media-strateeg.
My Life het Donderdagaand by die restaurant Camil in Groenpunt aan ’n groep genooide gaste die Ubuntu Village-konsep bekend gestel en terselfdertyd ’n veiling gehou om die organisasie te help met finansies.
Die eregaste was Zille en mnr. Ndaba Mandela, kleinseun van oudpres. Nelson Mandela. Bekendes soos Natalie Becker, Ferdinand Rabie, Louw Venter en Andy Wilson het ook die geleentheid bygewoon.
Zille het geskerts dat sy amper nie die rok wou uittrek nie, maar sy moes dit maar ná sowat ’n uur en ’n half aan die organisasie gee.
Vermeulen het aan KaapRapport gesê dit was vir hom ’n groot eer om die rok te ontwerp. Hy en die premier moes gou spring – daar is selfs nog ’n halfuur voor die geleentheid aan die rok gewerk.
“Ek wou wys dat Zille, ten spyte van haar hoë posisie in die politiek, ook vroulik en sexy kan lyk.”
Dit was vir hom wonderlik toe Zille voor die spieël staan en “soos ’n dogtertjie” rondswaai. “Dit het die jong meisie in haar uitgebring.”
Zille het by die geselligheid gesê sy voel pragtig. “In dié rok voel ek soos ’n jong vrou. Ek voel mooi, sommer soos ’n million dollars.”
* Die rokke word op www.bidorbuy.co.za verkoop.