Land hou duim vas vir ren-wonderwek
2012-01-14 13:39
Die F1-kommentator Murray Walker was beroemd – of eintlik berug – vir die aantal kere wat hy jaers voortydig met ’n uitstekende vertoning gelukgewens het. Oomblikke ná Murray se lofliedere het die kommentatorsvloek alte dikwels toegeslaan.
Ons wil nou nie ’n Walker op Giniel de Villiers en Duncan Vos trek nie, maar tot en met Vrydagoggend se ter perse gaan het Suid-Afrika se twee bulbestuurders uitstekend gevaar, met De Villiers in die algehele derde plek, en Vos tiende. Watwou, en nóg ’n Toyota Hilux-bakkie, soortgelyk aan ons manne s’n, het sesde gelê in die hande van die Argentyn Lucio Alvarez.
Wat ook al oor die laaste drie dae in Peru gebeur het – of gaan gebeur – sal geen afbreuk doen aan wat die Toyota Imperial-span onder tegniese en taktiese leiding van Glyn Hall vermag het nie. Daar is vooraf gesê dat dit feitlik ’n wonderwerk sou wees as De Villiers en navigator Dirk von Zitzewitz of Vos en navigator Rob Howie onder die eerste vyf eindig.
Beland De Villiers-hulle later vandag op die podium, sou mens dit skaars kon glo. Wen De Villiers se voertuig no. 301 – en teen Vrydag was daar nog ’n skaflike kans dat dit moontlik was – sou mens dit as ’n wonderwerk moes beskou; een van die grootste prestasies agter die wiel van ’n renvoertuig in ’n bittere lang tyd. Juis omdat die Toyotas ’n fraksie van die ontwikkelingstyd en -koste geniet het wat gewoonlik aan topvoertuie bestee word.
Kom ons hou dus duim vas vir daai wonderwerk!
* Lees ook hier.