Lexus dryf na groen, aweregse skoonheid
2012-01-14 13:39
- Artikelopsies
- Deel
- Kry Rapport op
Lexus het die LF-LC, sy nuwe ontwerpkonsep vir ’n agterwielgedrewe hibried-2+2-sportkoepee, op die Noord-Amerikaanse internasionale motorskou in Detroit onthul.
Lexus reken die LF-LC is tekenend van die grootste verandering in die maatskappy se geskiedenis, iets wat reeds deur die nuwe GS-model se spitsrooster (soortgelyk aan die LF-LC s’n) vergestalt word.
Met die LF-LC, wat in die Calty-ateljee in Kalifornië ontwerp is, word die vernuwing ’n tree verder gedryf met heelwat elemente wat oor die volgende 24 maande deel van die Lexus-reeks sal word.
Die idee, sê die Japanners, is om die voorkoms van hul motors met emosie, ’n aweregse skoonheid en die gevoel van gevorderde tegnologie te bedeel. Só word met die LF-LC se lyne klem op rigting en beweging geplaas.
Die ligte word in ’n “L”-vorm aangebied. Agterlangs is daar vier groot uitlaatpype.
Die vraag is of Lexus nou ook ’n waarlik stylvolle weeldekajuit kan ontwerp wat die ander uitmuntende kenmerke – soos puik enjins en ratkaste, asook verstommende verfyning – kan aanvul?