Tata, die verlede . . .
2010-02-13 11:14
- Artikelopsies
- Deel
- Kry Rapport op
So, wat het ons hier? ’n Motortjie wat aan ’n identiteitskrisis lei? Want op verskillende plekke op sy bakwerk word hy as ’n Tata, ’n Indica, ’n Vista en ’n Ignis geïdentifiseer.
Wel, dis natuurlik omdat hy die Tata Indica Vista Ignis is.
Dis ’n lang naam vir so ’n kortetjie, 5 mm minder as 3,8 meter, van buffer tot buffer.
Maar hier’s die interessante maat: die Tata Indica Vista Ignis – met Vista wat op ’n splinternuwe platform vir die Indica dui, en Ignis wat die hoogste spesifikasievlak verteenwoordig – die Vista Ignis pas 2,470 m tussen sy voor- en agteraste in. Dis nie klasleidend nie. Vir meer agterkajuitruimte rek die Renault Clio genoemde afstand tot by 2,570; net-net beter as die Peugeot 207 (2,540) en Hyundai i20 (2,525).
Die Vista se 2,470 m is egter gelyk aan die nuwe VW Polo s’n. Ons wil ons verder verstout deur te sê dat sy verpakking sodanig is dat dit meer beenruimte in die agterkajuit skep.
Nie sleg nie?
Wel, hier’s wat dit nóg indrukwekkender maak: van al die genoemde outjies is Vista gemaklik die kortste. Dit krimp die draaisirkel en beperk gewig; die Ignis weeg net 1 055 kg; die goedkoper Ini- en Aura-modelle (wat uit ’n aangepaste portefeulje van die oorspronklike Indica spruit) weeg sowat 1 030 tot 1 035 kg.
Dit nou onder meer omdat die Ignis se remskywe voor en -trommels agter met ABS plus EBD toegerus is – iets wat afwesig op die Ini en Aura is. En hier’s ons woord van waarskuwing: hou by motors met ABS-remme.
Tydens noodremtoetse op ’n Chery QQ3 sonder ABS het ons die motortjie byvoorbeeld teen 110 km/h hééltemal verloor toe hy, weens ’n remdrukverspreidingsprobleem, wild – en in minder as ’n oogwink – buite beheer getol het. Oor twee lane het hy getol en ’n sypaadjie getref, met nare gevolge vir die linkervoorwiel en dryfas. ’n Tweede Chery is teen 100 km/h, en weer teen 90, 80 en 70 km/h verloor. Dis eers teen 60 km/h wat ons die tolslag kon vang en beheer.
Dis natuurlik lewensgevaarlik. Wat net een ding beteken: ABS-remme is ’n moet, al het ons tydens vergelykende toetse tussen die QQ3 en teenstanders soos die CitiGolf, Kia Picanto, Hyundai Atos en die vorige Indica sonder ABS nie noemenswaardige remprobleme met die Tata ondervind nie.
Selfs die QQ3 met ABS het redelik – maar belangriker nog, veilig – gerem.
Buiten ABS tel ’n hidrouliese kragstuur (wat lekker draai; nie te lig nie, nie te swaar nie), lugversorging, kragvensters alom, kragspieëls, twee voorste lugsakke, ’n hoogteverstelbare stuur en drywersitplek, voorste en agterste kragsokke en misligte, ’n agterruitontwasemer, radioklank en ’n USB-poort plus afstandbeheerde sentrale sluit as standaardtoerusting op die Ignis.
Nog beter is die enjintjie, Fiat se 1.4-liter Safire-bron (65 kW, 116 Nm) waarvan die blok uit Brasilië na Tata se aanleg in Ranjangoan ingevoer word. Hy’s een van daai ou-skool-kanniedoods, ’n oondjie wat skynbaar vir ewig sal aanhou al saag jy teen 130 km/h op die warmste dag deur die Karoo – wat ons wel gedoen het, teen ’n gemiddelde verbruik van sowat 7.5 liter/100 km. Die vyfganghandrat roei ook maklik, indien effe onreëlmatig wat skuifgapings tussen gange betref.
Beste van alles is egter die Vista se uitstekende ritgehalte op voorste MacPhersonstutte en ’n wringbalk agter; die karretjie is volmaak vir hedendaagse Suid-Afrikaanse padtoestande ingestel. Lekkerder gaan jy nie ry nie, laat staan nog op so ’n kort asafstand.
Swakpunte? Wel, die Ignis bied ’n gemaklike stuuraksie, maar hantering word deur sagte veerinstellings gekniehalter. Die nuwe voorpaneel se sentrale instrumentpaneel maak afstandlesings ook moeilik as die spoednaald net mooi oor genoemde syfers (in ’n aaklige helder kristalblou) swiep of rus – wat dikwels is.
En dis onmoontlik om radiostasies en dies meer in te stel; beheerknoppe en -funksies is eenvoudig so teen-intuïtief in werking dat mens na ’n kort tydjie tou opgooi.
Die res is ’n groot verbetering op die ou model. Nou’s dit net ’n kwessie of jy saam met die voorpaneel se elektroniese muisnes wil lewe, of jy vir ’n Tata in ’n noodsituasie kans sien en of jy nie eerder 10 000 meer vir ‘ hyundai i20 1.4 wil betaal nie.
- Rapport