- Artikelopsies
- Deel
- Kry Rapport op
1 300 slagoffers en ons tel nog...
deur Giel, Groot Brak
2013-01-10 13:59
Dis ongelooflik hoe ons mense op die paaie letterlik afgemaai word én die ouens met dik brille bly net praat en dreig.
Ongewone toestande (soos dié verseker!) eis ongewone drastiese stappe.
Ek sal graag 'n klip in die bos wil gooi...
1. Verminder die spoed op ons snelwee na 110 km/h (o ja, daar sal onmiddellik mense wees wat skreeu: “Dis onproduktief en dit sal ons ekonomie strem. Ek dink daar is veel meer voordele – minder mense dood, minder brandstof word gebruik, kos ons dus minder buitelandse valuta en minder pad- en voertuig-onderhoud...)
2. Spoedboetes vir dié wat graag 120 km/h wil ry, is op 'n glyskaal vanaf 115 - 120. (Meeste ry hopelik onder 115.)
3. Spoedboetes oor 120: R 1 000 per km vanaf 110 km/h
4. Spoedboetes oor 140 km/h – R 2 000 km/h vanaf 110 én sy motor (vir 2 jaar) word gekonfiskeer en lisensie opgeskort.
Daar kan dalk 'n probleem wees met dié wat geld skuld op motors. Ek dink tog daar kan wetgewing wees wat finansieringshuise verplig om 'n klousule in hul kontrakte te sit wat kopers attent daarop maak dat as hul motors sou gekonfiskeer word, hulle die uitstaande bedrag onmiddellik moet betaal.
5. Die vraag onmiddellik – hoe beheer mens dit, wat van korrupsie by beamptes wat die wet op die paaie moet toepas?
Ek dink dis maklik. As ek my kredietkaart in Pofadder gebruik, kry ek onmiddellik (of maksimum 1 dag) later ‘n sms van die bank af wat my inlig van die transaksie.
Nou hoekom nie dieselfde tegnologie inspan met ons verkeersbeamptes nie? As die spoedinstrument 'n spoedoortreding registreer, dan word 'n boodskap deurgestuur na die beampte se kontroleplek. As hy/sy weer by sy kantoor kom, kan die boetes wat geskryf moes word dan gekontroleer word met die elektroniese data. Dit sal korrupsie grotendeels uitskakel.
As beamptes weet daar is goeie beheer, sal net die vrot appels probeer en hulle sal gou uitgeskakel word.
6. Ja, daar is ook ander faktore wat aangespreek moet word, soos roekelose- en dronkbestuur. Daarvoor het ons meer prominente polisie-teenwoordigheid op ons paaie nodig. Dalk kan van die gekonfiskeerde voertuie (en daar sal baie nuwes wees) ingespan word, dit sal die wetstoepassers sekerlik meer mobiel maak, juis in 'n tyd dat daar nie geld vir hul begrotng is nie!
7. En stadsgbiede? Weereens, die spoedgrense moet verlaag word.
8. 50 km/h. Die ouens wat graag 70 wil ry betaal 'n glyskaal boete vanaf 60 – 70. As hy/sy 80 ry is die boete R 250 p/km vanaf 60 en oor 80 is dit R 500 p/km vanaf 60. Oor 100 km/h, word sy lisensie summier opgeskort vir 2 Jaar.
Ek sien trouens op die nuus dat Engeland hul stedelike spoed (in sekere gebiede) verminder het na 20 myl/h (rofweg 32 km/h).
9. Hoe maak ons seker mense betaal hul boetes? Een of ander tyd moet 'n motorlisensie of bestuurslisensie hernu word. Dit moet dan onmoontlik wees om dit te doen as daar boetes uitstaande is!
10. Ons moet die tegnologie gebruik tot ons voordeel. Die mensdom het dan al 'n mens op die maan geplaas – niks is meer onmoontlik nie? (Ja, daar is ouens wat sê: “het ons regtig?”)