- Artikelopsies
- Deel
- Kry Rapport op
ANC moet die weg aanwys na beter
deur Hennie Pienaar, Bellville
2012-10-20 23:51
Die ekonomiese onrus van die laaste paar weke met intimidasie, sterftes en miljarde rande se skade en verliese is nog lank nie verby nie.
Ironies dan dat die minister van finansies, Pravin Gordhan, ’n beroep op mense doen en sê “alle Suid-Afikaners moet saamstaan om ’n positiewe uitweg te vind vir die huidige moeilike ekonomiese situasie in die land”. Hy word so aangehaal in RSG se nasionale nuusbulletin Maandag om 13:00, met dié berig die hoofstorie, maar die eerste vyf uit die agt berigte handel oor die stakings wat net al hoe meer uitbrei.
Dan sê Gordhan die ANC-regering moet nou sy pogings verskerp om die lewe van die meerderheid Suid-Afrikaners te verbeter, en dan “hoewel elke Suid-Afrikaner ook ’n bydrae tot dié uitdagings kan lewer”. Alles goed en wel, maar begin by die ANC-regering wat aanhou om bedrog en korrupsie te verduur!
Ja, dit is die regte ding om na alle Suid-Afrikaners se welvaart en ontwikkeling te kyk, maar die Instituut vir Sekuriteitstudie word aangehaal waar aangedui word dat meer as R30 miljard jaarliks verlore gaan weens korrupsie. Is dit hoe Suid-Afrikaners ’n bydrae lewer, of die staatspresident met sy “huisie” van R203 miljoen, om nie eens te praat van die koste om die paaie soontoe op te gradeer nie.
Stakende mynwerkers by Kumba se Sishen-ysterertsmyn gryp toerusting van sowat R3,3 miljard en dreig om dit te vernietig.
Is dít hoe Suid-Afrikaners ’n bydrae maak?
Ongelukkig is ’n groot persentasie van die “Suid-Afrikaners” totaal en al onkundig oor die gevolge van die stakings en vernielsug en is dit nutteloos om ’n oproep om bydraes te maak.
Ongelukkig weet die grootste deel van die bevolking glad nie waarmee hulle besig is nie.
Kry die skoolboeke gereed en stuur al die stakers vir klasse om te leer hoe jy nié ’n bydrae lewer nie.