- Artikelopsies
- Deel
- Kry Rapport op
Afrikaans was toe gróót, baie groot!
deur Gezina Uys, Pretoria
2012-10-20 23:51
Vir maande het ons uitgesien na die Afrikaans is groot-konsert, en wat ’n belewenis was dit nie!
Sommer vroeg al wou ek ry.
Manlief het nog gebrom oor die rugby en dat ons seker die enigste sal wees wat so vroeg daar aankom. Maar ons moes soek na ’n parkeerplek. Al wat leef en beef was al daar! Ons is die ouditorium binne en wat ’n gesig om meer as 7 000 mense in afwagting te sien sit! Maar die beste het nog voorgelê!
Wat ’n ongelooflike konsert was dit nie. Om Theuns, Bok, Steve en Jannie op een verhoog te sien staan en saamsing – wat kan mens meer vra? Die beste was dat elkeen van hulle en al die ander ongelooflike kunstenaars van hul mees geliefde liedjies gesing het soos net hulle kan. Voorwaar, Afrikaans is groot was gróót, baie groot!
Om na al die top- Afrikaanse kunstenaars in een aand te kon luister was ’n groot voorreg en het ons trots gemaak op ons mooi taal. Alles was net reg: die klank, beligting, keuse van kunstenaars en liedere, die uitrustings en verloop van die program. Welgedaan!
Dankie aan elkeen wat ’n aandeel in die onvergeetlike gebeurtenis gehad het.