- Artikelopsies
- Deel
- Kry Rapport op
Afrikaner-toekoms verbind aan hele SA
deur R. van Jaarsveld, Centurion
2012-07-21 23:58
Die vraag in Rapport Weekliks (15 Julie) of Afrikaners “rigtingbedonnerd” is, moes onvermydelik interessante debat ontlok.
Dat die meeste van die “leiers” te kenne gee dat almal eintlik saamstem, maar net verskil oor metodes, is myns insiens ’n ontkenning van beduidende verskille. Dit is belangrik dat mede-Afrikaners hierdie klemverskille sal raaksien omdat dit belangrik is vir die toekomspad wat ons gaan kies.
Pieter Mulder se keuse is dié van politieke deelname: ’n Doodloopstraat, in ag genome die werklikheid van die land se demografie. Politiek gaan oor getalle en in dié opsig sal die Afrikaner as ’n klein minderheid geen impak maak nie. Dis deeglik bewys sedert 1994. Tereg word na Mulder verwys as ’n opportunis. Hy is afkomstig uit ’n politieke huis, maar besef nie politiek sal die Afrikaner nêrens bring nie. Die 2014-verkiesing sal waarskynlik die einde van hierdie doodloopstraat beteken.
Dan Roodt, na wie verwys word as die ekstremis, meen ’n volkstaat is die antwoord. Hierdie onrealistiese droom mislei Afrikaners oor die pad vorentoe, want dit is gewoon ’n onrealistiese en onhaalbare droom. Orania het dit bewys; net ’n bitter klein minderheid Afrikaners wil daarheen verhuis. Ekonomiese werklikhede maak dit nie ’n opsie nie. Daar is groter, nie-amptelike “volkstate” binne die groter Suid-Afrika. Dan woon self in so een.
Steve Hofmeyr, die populis, tree as selferkende Afrikaner-aktivis daadwerklik op in belang van die Afrikaner. Hy staan op vir ons regte, maar wil by die nuwe Suid-Afrika hoort. Hierdie opsie is haalbaar, realisties, eerlik en dapper. Ek kan my maklik daarmee vereenselwig.
Steve is versigtig, maar moet ook weet mens kan nie op al die stoele gelyk sit nie. Eerlikheid vereis dat ons mede-Afrikaners sal ontmoedig om radikale praatjies te maak.
Flip Buys, met Solidariteit en AfriForum, bied waarskynlik die beste opsie. As ’n beduidende kulturele minderheid is die Afrikaner se toekoms ten ene male verbonde aan die toekoms van die groter Suid-Afrika, maar dan buite die formele politiek.
Die Grondwet is daar om die individu en dus minderhede se regte te beskerm en as dit geminag word, is die howe daar om dit af te dwing.
Kulturele minderhede, soos die Joodse, Portugese en Griekse gemeenskappe, oefen hul individualiteit uit binne die groter gemeenskap, sonder deelname as groep aan die politiek. Hierin lê tans waarskynlik ook ons heil.
Die najaag van ’n onrealistiese utopie en ligsinnige oorlogspraatjies is bloot misleidend en gevaarlik. Kom ons raak volwasse as volk en tree op met waardigheid binne die werklikhede van ons geliefde vaderland.
Laat ons die regte opsies uitoefen; ter wille van oorlewing, en ook van ons nageslag.