- Artikelopsies
- Deel
- Kry Rapport op
Belhar-voorwaarde soos pistool teen kop
deur Koot Bosman, Pretoria
2012-10-13 23:14
Dit is inderdaad so: Daar is werklik ’n verskil in siening tussen die jonger en ouer generasies NG Kerk-teoloë en -lidmate oor kerkhereniging en Belhar (Rapport, 7 Oktober: “Belhar: Daar is niks om oor te praat nie”).
Die jonges beleef kerkeenheid en Belhar anders. Dit is begryplik. Hulle behoort immers anders te voel en dink oor sake waarvan hulle as jonger generasie die agtergrond nie ken en verstaan nie.
Dit is egter nodig om perspektief te behou.
Wat hulle dalk in hul onbegrip kan help verstaan, is om dié vraag te probeer beantwoord: Waarom is die Belhar-dispuut reeds ongeveer 30 jaar lank hoegenaamd op die tafel?
Politieke bymotiewe agter die skepping van die Belhar-belydenis word deurgaans emfaties ontken. Dieselfde Rapport-berig bevestig egter implisiet die politieke begronding van die belydenis wat deur die jare in die NG Kerk aangevoel word: Die VGK weier om met die NG Kerk te verenig as die Belhar-belydenis nie deur laasgenoemde aanvaar word nie.
Anders gestel: Ek hou ’n pistool teen jou kop; doen wat ek sê.
Dit is weliswaar ’n houding lynreg teenoor die pragtige Christelike beginsels waarop Belhar gebaseer is. Die NG Kerk het die suiwer Christelike grondslag van Belhar nog deurgaans bevestig, asook die behoefte aan kerkeenheid.
’n Wenk aan die jonger NG predikante: Help eerder die ouer geslag om die VGK van sy onchristelike houding te laat afsien sodat die noodsaaklike kerkeenheid spoedig werklik kan word in ’n Christelike gees van wedersydse vergifnis, vertroue, liefde en eensgesindheid.