- Artikelopsies
- Deel
- Kry Rapport op
Boender pienk olifant nóú uit
deur Johann Basson, Pretoria
2012-09-16 01:16
Daar is ’n yslike, pienk olifant in Suid-Afrika se voorhuis waaroor die meeste Suid-Afrikaners nie wil praat nie. Hulle praat eerder oor rugby, sokker, bier, braaivleis, korrupsie, geweld, stakings, swak dienslewering en hoe om vir min moeite gou skatryk te word. Hulle probeer die olifant wegdink!
Dié pienk olifant is ’n hoofoorsaak waarom Suid-Afrika ’n toekomstige “verloorland” in die globaliseringstryd kan word. Dié oorsaak is die ongebreidelde Suid-Afrikaanse bevolkingsaanwas in verhouding tot die beskikbare, volhoubare bronne en verdien van buitelandse valuta.
Suid-Afrikaners sal met mekaar en op haas elke forum oor die pienk olifant moet praat. Ons leiers sal hul “klein politiek” moet laat staan en praat oor hoe ons die olifant uit die Suid-Afrikaanse voorhuis gaan kry en uithou. Indien ons misluk, gaan ons huis al hoe meer verniel en bevuil word en gaan die huisinwoners al hoe meer stakings hou en onderling baklei oor die gemors, gebrek aan bronne en swak dienslewering.
Dit terwyl dwelmhandelaars, natuurstropers en politieke opportuniste die situasie misbruik.
Nou is die tyd om die pienk olifant uit die huis te kry.