- Artikelopsies
- Deel
- Kry Rapport op
DA-plakkaat misken diversiteit
deur Johan Barnard, Pretoria-Noord
2012-02-04 14:43
Helen Zillle verdedig die DA-jeugvleuel se tussenrassige erotiese plakkaat, want sê sy, volgens Rapport van Sondag, 29 Januarie, die DA glo in oop geleenthede, diversiteit, versoening en regstelling. Sy sal ook nie die jeugvleuel oor sy keuse van die plakkaat tot orde roep nie.
Zille en die DA toon hiermee beperkte begrip van die betekenis van diversiteit en versoening. Deur diversiteit onderskryf jy die erkenning en beskerming van ? verskeidenheid van gemeenskappe. Versoening impliseer op sy beurt gesonde betrekkinge tussen gemeenskappe – gemeenskappe waarvan die integriteit en permanensie erken word. Zille en die DA staan nie diversiteit voor nie, maar assimilasie. Assimilasie is die teenoorgestelde en die vernietiger van diversiteit. Zille verdedig dus die banale en blatante propagering van assimilasie.
In haar reaksie op die plakkaat sê Zille verder dat die DA regstelling voorstaan, waarmee sy dus sê dat interras-seks vir haar en haar party die versinnebeelding van regstellings is. Assosiasie met inbegrip van erotiese assosiasie tussen mense van dieselfde ras – tussen wit en wit of swart en swart - voldoen klaarblyklik gevolglik nie aan Zille en haar party se beeld van regstelling nie. Die assosiasie moet juis soos die DA-plakkaat dit uitbeeld, tussenrassig wees om Zille se beeld van regstelling te bevredig.
Met hierdie plakkaat en Zille se ondersteuning daarvan is die DA se intellektuele en ideologiese bankrotskap grafies gedemonstreer. Daarmee het die DA ook my stem, wat ek herhaaldelik vir die party uitgebring het, verbeur. Voortaan sal ek as Afrikaner uitsluitlik verdienstelike burgerlike organisasies ondersteun.