- Artikelopsies
- Deel
- Kry Rapport op
Dank aan Zille vir steun van plakkaatveldtog
deur A. Rautenbach, per e-pos
2012-02-03 12:54
Die reaksie wat DA-jeug se plakkaat-veldtog onder DA-ondersteuners ontlok het, is onverstaanbaar en benodig dringende selfondersoek. Die vraag is eenvoudig of die DA-jeug buite die beleid en waardes van die party opgetree het. Die antwoord is ‘n besliste nee.
Max du Preez moet ondersteun word in sy betoog dat die DA ontslae moet raak van die konserwatiewe- en anti-gaygroep binne die DA. Hulle is ‘n minderheid wie se mening te veel publisiteit geniet.
Die DA se stop Zuma-veldtog het met die vorige verkiesing vir hom baie stemme verseker, maar daarmee saam het ook baie konserwatiewes op die wa gespring. Bevry die DA hom self nie van hierdie groeperings nie, beperk hy sy groeipotensiaal onder swart mense.
Binne die konteks van die veldtog is dit ‘n jammerte dat die “DA-plakkaat” wat homoseksuele verhoudings oor die kleurgrens heen voorstel ‘n vervalste een was. Daar is ‘n sterk teenwoordigheid van gay-studente op ons kampusse en mag ons hierdie studente nie uitsluit van die hoofstroom nie.
Mnr. Makashule Gana die jeug-leier beindruk met die waagmoed wat hy aan die dag lê met hierdie plakkaatveldtog. Hy het baie ontstel maar soos hyself sê: “Ons kan doen wat ons wil, solank ons binne die DA se waardes, beginsels en visie bly.” Dankie aan Helene Zille wat hom ondersteun en haar seën oor hierdie veldtog uitgespreek het.
Sterk asseblief die hande van ons leiers deur saam te bou aan ‘n toekoms vir almal in hierdie pragtige land van ons.