- Artikelopsies
- Deel
- Kry Rapport op
Die Maya-kalender en Die Einde
deur Jan Venter, Bloemfontein
2013-01-10 14:45
“Dit verseker Ek julle: Daar is party van dié wat hier staan wat beslis nie sal sterwe voordat hulle die Seun van die mens in sy koninkryk sien kom het nie.” (Mat.16:28)
Dié wat dit letterlik opgeneem het wag nou reeds bykans 2 000 jaar lank daarvoor.
En uit Daniël en ander geskrifte is daar deur die eeue ook ander sommetjies gemaak oor wanneer die einde van die aarde gaan aanbreek… Gelukkig vir ons, weet niemand nie, en was al hierdie voorspooksels en profesieë nog altyd verkeerd.
Laasjaar, toe die bestaande Maya kalender op 21 Desember 2012 die einde van sy raklewe bereik het – soos ons kalenders elke jaar doen – was dit weer sulke tyd.
In die polemiek wat daarop gevolg het, het verreweg die grootste eienskap van die Maya beskawing – nl. die wonderbaarlike akkuraatheid van hulle kalender – ongesiens by ons almal verbygegaan. Hulle het ongetwyfeld oor die beste kalender wat die wêreld ooit geken het beskik.
Die lengte van ‘n jaar was volgens die *Mayas 365,242129 dae, teenoor die 365,242198 dae volgens hedendaagse astronomiese berekeninge.
Dit verteenwoordig ‘n verskil van minder as 6 sekondes per jaar! Die fout op die Juliaanse kalender was honderd-en-dertien maal so groot.
Om dit in perspektief te probeer stel, oor ‘n tydperk van 14 500 jaar sou die Mayas slegs een dag uit gewees het as ons dit vergelyk met ons huidige berekeninge, wat gedoen word met die gevorderdste apparate en hulpmiddels denkbaar. Anders gestel, oor die 2 013 jaar van ons huidige jaartelling is hulle kalender slegs 3 uur 20 minute uit – ’n diskrepansie wat hulle sekerlik dadelik sou opgespoor en reggestel het.
(*Maya-kalender; Bron: C.W.Ceram: Götter, Gräber und Gelehrte)