- Artikelopsies
- Deel
- Kry Rapport op
Dié soort houding oral
deur Zondra Hoffmann, Brackenfell
2012-10-13 23:14
Die artikel “Toorn van ’n aspris nurse” (Weekliks van 7 Oktober) het betrekking. Wat ’n wonderlike beskrywing van die 13 dae wat dié merkwaardige vrou moes deurmaak in ’n inrigting wat eens op ’n tyd die top- mediese fasiliteit in ons land was.
Haar beskrywing van die personeel is bewys van die ongenaakbare, byna ongeskikte, weerbarstige houding wat alledaags openbaar word teenoor mense in hierdie land. Waar daar ’n mate van respek was, is nou opvallende verset en disrespek.
Ek sien dit elke dag as ek in ’n winkelsentrum moet loop. Ek moet áltyd padgee of ek word uit die aarde geloop deur mense baie jonger as ek.
Dit is ook die algemene houding van werkers in ons land in die geheel, waar mense wat veronderstel is om “diens te lewer” g’n flenter omgee nie en boonop onbevoeg is om die werk te doen. Dan verdien hulle uitermate hoë salarisse met soveel byvoordele jy hoop jou kleinkind slaan een of ander tyd so ’n pos los.
Ek haal my hoed af dat sy die moed gehad het om openhartig en eerlik dié verhaal neer te skryf.