- Artikelopsies
- Deel
- Kry Rapport op
Dié wat wíl werk en dan die williewerkers
deur Reinhold Swart, Bellville
2013-02-02 23:25
Antoinette Slabbert se insiggewende artikel (“Doen jul eie werk, sê OG”, Sake24, 27 Januarie) kon ook gestaan het onder die banier-opskrif “Los jul luiheid en werk”.
Sy verwys na die vaardigheidstekorte in ons land en die astronomiese konsultantegeld as die jongste in ’n reeks regering-“skandale”. Mnr. Kimi Makwetu, adjunk-ouditeur-generaal, verwyt die konsultante dat hulle nie hul kennis met die amptenare deel nie, maar dit is eerder ’n gebrek aan leergierigheid by die amptenare en ’n dringende behoefte om in hul werk onderleg te raak. Waarom moeite doen as iemand anders jou werk vir jou doen?
In ons agtergrond en kultuur is vlytigheid maar dun gesaai. Tradisioneel, in die swart kultuur, het die mans teen die kraalmuur gesit, die kinders het die vee opgepas en die vroue het op die land gewerk. Ons wittes was weer te goed om hande-arbeid te verrig. Tydens ’n besoek aan Europa sal jy sien hoe wittes werk as melkman, tuinman of posbode. Maar hier wil ons wittes ’n bestuurspos hê wat min inspanning verg.
Die afgelope week het pres. Jacob Zuma die onlangse stakings as iets edels probeer verdedig. In ander lande beteken om te staak om jou te beywer vir ’n beter bestel. By ons beteken dit om nie te werk nie en te plunder, roof en te beskadig.
Die groot, drieledige dilemma van Suid-Afrika is die miljoene werkloses, dan dié wat ’n werk het, maar nie wil werk nie, en dan die immigrante uit ons buurstate wat smag na hierdie werkgeleenthede.
Mens tref laasgenoemde oral by verkeersligte aan met pleit-briefies in die hand. Hulle wíl werk. Wat nou?