- Artikelopsies
- Deel
- Kry Rapport op
Dis hoekom Suid-Afrika so ly
deur Sarel Myburgh, Pretoria
2012-09-22 23:41
Die onlangse gebeure by Lonmin was ’n blootlegging van die situasie waarin Suid-Afrika hom bevind en kan aan ’n paar kernkwessies toegeskryf word.
Eerstens het die ANC-regering die afgelope 18 jaar tydens elke krisis die verwerplike apartheid met al sy “gruweldade” as rede vir die gebeurlikhede blameer.
Vir die Lonmin-debakel kry die Britte nou die blaam en apartheid moes die blaam dra vir die Limpopo-handboekkrisis.
Baie min mense sal nie toegee dat apartheid sekere voordele vir minderhede ingehou het nie – maar die blaam op die verlede los nie vandag se krisisse op nie.
Tweedens is daar in die regering en ander semi-staatsinstellings ’n totale gebrek aan leierskap. Dit gaan hand aan hand met die onbekwaamheid van amptenare in kritieke poste van nasionale tot plaaslike vlak.
Derdens is van die land se leiers te oud. Tot ’n groot mate is hierdie aspek ’n Afrika-fenomeen.
Dan word nog tougetrek om hul regeertermyn te verleng.
Van bekwaamheid, kennis en effektiwiteit is daar bitter min sprake.
In sommige Westerse demokrasieë word leiers al op 38 jaar as topleiers verkies. Hulle is in groter voeling met hedendaagse praktyke en ook met die jeug.
Van die oplossings is om bekwame leiers in kritieke poste in die staatsdiens aan te stel en verby ras te kyk. Die aanstelling van bekwame leiers sal ook integriteit in die staatsdiens begin vestig.