- Artikelopsies
- Deel
- Kry Rapport op
Dit wás skande, maar nou se bevoorregting is dieselfde ding
deur Schalk de Beer, Tshipise
2012-07-14 16:01
Prof. Anton van Niekerk is reg wanneer hy ons herinner dat die ingrypendste aspek van geïnstitusionaliseerde apartheid die verontmensliking van sy slagoffers was. Dis ongelukkig bitter waar. Lees maar hieroor by mense soos Adam Small en ander skrywers na wie ons nie wou luister nie.
Daarteenoor moet hy darem in ag neem dat ons wittes reeds daarvoor betaal het en aanhou betaal. Ons het die totaliteit van staatsbesittings van onberekenbare waarde en die mag daaroor aan swart mense oorgedra en betaal steeds uit ons belastinggeld miljarde rande aan subsidies.
Dan verwys hy na “’n radikaal ongelyke samelewing wat steeds die verdelingslyne van die apartheidsbestel weerspieël”. Hy moet net na enige staat in Afrika kyk om dieselfde of erger verdeling van rykdom te sien waar apartheid nooit bestaan het nie. Die verskuiwing van ’n hele land se bevolking van ’n bestaansekonomie na ’n kapitalistiese stelsel het in Westerse lande honderde jare geduur. Waarom sou dit hier anders wees?
Daarby verswyg hy ook die feit dat daar wel ’n middelklas van “ryk” swart mense in Suid-Afrika bestaan.
En die ANC bedryf met sy ekonomiese bevoorregtingswette ook maar apartheid, want hy moet onderskei tussen swart mense wat bevoorreg en wit mense wat benadeel moet word. Hulle het net nie die moed om toetse voor te skryf om daardie onderskeid tussen die groepe te maak nie.
Om my kleinkinders met ’n “begunstig deur apartheid”-teerkwas te smeer is die onbillikste moontlike daad.