- Artikelopsies
- Deel
- Kry Rapport op
Eerder aftreepaleis, sou Zuma trekpas kry
deur Hennie Pienaar, Bellville
2012-10-07 01:25
Nuusberigte oor die opgradering van pres. Jacob Zuma se “plaashuis” in Nkandla laat sedert die afgelope naweek al die wenkbroue lig, maar die jongste verduideliking van sy woordvoerder, Mac Maharaj, is werklik lagwekkend.
Die verskoning is dat die “plaashuis” opgegradeer word sodat dit “sowel sy (die president se) personeellede as gaste” kan huisves. Dan word daar gevra wat gedoen kan word indien byvoorbeeld pres. Obama of ’n Afrika-staatshoof die president besoek en hulle tog nie “na ’n hotel gestuur kan word nie”.
Mensig, nè!
Ek was al die jare onder die indruk dat die presidensies (die president se amptelike huis) in verskillende stede in Suid-Afrika juis die plek is waar hy staatshoofde sal of behoort te ontvang? Wat gebeur as pres. Zuma in Desember ge-Mangaung word en hy nie weer as president verkies word nie? Dan tree hy, lyk my, rustig af in sy lekker nessie? Dié groter “plaashuis” gaan nog duurder wees om te onderhou en ek laat my nie vertel pres. Zuma gaan pa staan vir die onderhoud nie. Gaan die president ná sy aftrede dieselfde getal mediese en veiligheidspersoneel hê, of gaan daar dan ’n paar kamertjies leeg staan?
Hoe het vorige presidente in die ou bedeling afgetree, of val dié “opgradering” ook maar net onder die ANC se slagspreuk “Jy skuld my”?
Maar die president gaan sowat R10 miljoen self bydra en dit is vir my goeie nuus. Nou die dag was hy nog kniediep in die skuld en nou kan hy R11 miljoen bekostig.
Was dit dalk te danke aan sy vorige finansiële raadgewer se insette? Jy weet, die een wat op mediese parool vrygelaat is, maar danksy die vars lug op die gholfbaan nou skitterend gesond is.