- Artikelopsies
- Deel
- Kry Rapport op
Gediertes teisteraars
deur Helena Goosen, Garsfontein, Pretoria
2012-07-07 14:35
Ek sluit aan by Chris du Plessis se bydrae “Gevaarlike ongediertes... en hul honde” in Rapport, 1 Julie.
Onlangs stap ek laatmiddag deur ons woonkompleks. Skielik ruk ’n orige klein mopshond van sy leiband los en foeter reg voor my in – en daar slaan ek op die harde plaveisel neer.
Ondanks my meer as 75 somers oorleef ek die aanslag, met knieë en elmboë nerf-af en my ego taamlik gekneus. Die “jammer, Tannie” help ook nie om my gramskap te versag nie, want ek kon netsowel in die hospitaal beland het!
Teen dié tyd is ek keelvol vir keffende, gefrustreerde en aggressiewe brakke (ras-eg ofte nie) wat heeldag vasgekeer word in benouende agterplasies totdat hul eienaars eers teen skemertyd terugkeer van die werk.
Die oorywerige, bedorwe gediertes word dan vir ’n wandeling geneem om weerlose inwoners te teister. Ek is ook hartlik siek en sat vir al die “slagysters” wat oral op die gemeenskaplike grasperk uitgestal word.
Wat het die mens besiel om in te meng met Darwin se wette van natuurlike seleksie?
Om vreemdsoortige kreature kunsmatig uit die edel wolf te teel, van reusagtige, venynige tandmasjiene tot vermetele hakskeen-happertjies en Spielberg-gedroggies wat eerder in ’n rillerprent tuishoort?