- Artikelopsies
- Deel
- Kry Rapport op
Goeie plan, maar saamstaan ontbreek
deur James Young, Constantiapark
2012-12-16 00:04
Die brief “Die tyd is nou mense” (Rapport, 9 Desember) het betrekking. Ek glo dat duisende mense die mening van Frans Calitz deel. Of ons egter die moed van ons oortuiging en die durf het om belastings te weerhou, is ’n ander storie.
Die geskiedenis van Suid- Afrika die afgelope 50, 60 jaar wys daar is min gevalle waar ons werklik aan “Eendrag maak mag” gestalte gegee het.
Dit gaan meestal oor eie gewin en nie oor “die saak” nie.
Daarom is dit so dat mense soos pres. Jacob Zuma moeilik uit die kussings gelig sal word.
Hy het hom slim omring met besluitnemers wat waarskynlik ook in die slag sal bly as hy sneuwel en nie meer deel van die soustrein sal wees nie.
’n Verdere vier jaar in die “land van melk en heuning” is vir hulle ononderhandelbaar.
Mense wat ywerig “die saak” dien, laat nie goedsmoeds alles so verval soos wat ons sedert 1994 sien gebeur het nie.
By geleentheid in 1997 het mnr. F.W. de Klerk die beeld gebruik van ’n kano wat in ’n lang reeks gevaarlike stroomversnellings vaar. Jy begin die proses en bepaal die aanvanklike rigting, maar daarna word die kano deur magtige en soms onbeheerbare kragte gegryp.
Al wat die roeier kan doen, is om sy balans te behou, die rotse te vermy en die kano so gou doenlik weer regop te kry wanneer dit omslaan.
Is dit nie dalk tiperend van die Afrikaner se oorlewingstryd nie? Ons probeer maar net elke dag om kop bo water te hou. Sal dit nie wonderlik wees as ’n nuwe De La Rey ontwaak nie? En sal dit nie wonderlik wees as die Afrikanervolk hom dan in so ’n desperate laaste vesting bevind dat saamstaan al uitweg is nie?