- Artikelopsies
- Deel
- Kry Rapport op
Jonges vra ook ander stem as Malema s’n
deur Cilnette Pienaar, Stellenbosch
2010-03-06 16:45
Ek skryf as ’n besorgde jong Suid-Afrikaner wat moeg is vir die manier waarop een man se sieninge die stem vir almal onder die ouderdom van 35 in ons land geword het.
Ek is baie bekommerd oor die mediareaksie wat mnr. Julius Malema in dié stadium ontlok. Ek is glad nie gepla oor sy persoonlike menings, sy sake-affiliasies of politieke sieninge nie. Hy is immers geregtig op vryheid van spraak. Trouens, ons kan hom gelukwens met sy volgehoue passie vir sy meestal omstrede saak.
Wat my wel ontsettend pla, is dat daar nie ’n alternatiewe stem is om die groeiende groep jong vredemakers in ons land te verteenwoordig nie. Daar is ’n massiewe groep jong Suid-Afrikaners wat nie inkoop in die propaganda dat een man se geldelike welstand gelyk is aan die bevryding van sy volgelinge nie.
Dit klink vir ons te veel na die deuntjie van menige Afrika-leier wat die toegewydheid van hul lojale ondersteuners misbruik het vir eie gewin. Dis in die gees van vergewensgesindheid en eenheid dat ons, die res van die jeug, hierdie land wil help voortbou.
Ek sal die vegters vir geregtigheid in hierdie land ewig dankbaar wees vir hul offers. Ek sal hul lewens en veldslae eer en onthou. Sharpeville. Mitchell’s Plain. Robbeneiland.
Kan iemand vir Julius sê ons wil nie met hom baklei nie? Ons wil saam met almal in die land die diep wonde wat ons van ’n onregverdige stelsel geërf het, sien gesond word. Hierdie generasie het ’n beter kans as enige een voor ons om seker te maak dat “… never, never and never again shall it be that this beautiful land will again experience the oppression of one by another”.