- Artikelopsies
- Deel
- Kry Rapport op
Jou beurt: lesers skryf
deur
2013-01-13 00:04
UGO se skade groot
Die ANC pluk op groot skaal die wrange vrugte van uitkomsgebaseerde onderwys (UGO) – en sal dit nog lank pluk.
Een rede waarom op dié stelsel besluit is wat nog nêrens ’n sukses was nie, is dat dit toelaat dat gemiddelde en ondergemiddelde leerlinge redelik maklik slaag. Nog ’n rede was dat ondergekwalifiseerde onderwysers gebruik kon word.
Daar is mos geglo dat die onderwysers net fasiliteerders sou wees, want deur UGO ontdek leerlinge kennis en het nie hoogs gekwalifiseerde onderwysers nodig om te onderrig nie.
Leerlinge sou byvoorbeeld wiskunde “ontdek” wanneer hulle probleme oplos terwyl, volgens die ou uitgangspunt, die leerlinge wiskunde geleer moes word om probleme te kon oplos. Duisende onbevoegde onderwysers is toe losgelaat om te “fasiliteer”, maar al wat leerlinge “ontdek” het, was dat hulle weinig kennis bygekry het.
Die onderwysowerheid het intussen tot besinning gekom, maar soos in Engeland, waar UGO deur wetgewing uitgegooi is, vat dit lank om die skade ongedaan te maak. Om standaarde te verlaag is nie ’n oplossing nie.
– Izak Bergh, Marchand
Laat oortreders lyke sien!
Die hoofartikel “Paaie is hele jaar lank slagvelde” in Rapport van 6 Januarie het betrekking.
Dit lui: “Vergeet daarvan dat die slagting gou sal verbeter. Nie voordat padgebruikers ontsag begin toon vir... lewe nie”. Hoe kan ons die houding van ontsag bevorder?
Deur die oortreders bloot te stel aan die nare werklikheid en hulle só uit hul gemaksone ruk.
Wanneer vonnisse opgelê word, behoort daar veral op spesiale “gemeenskapsdiens” gefokus te word. Ek dink hier aan naweekdiens onder begeleiding by byvoorbeeld lykshuise! Of ’n paar uur se besoek aan die ongevalle-afdelings van groot opleidingshospitale.
Of wat daarvan om saam met noodvoertuie uit te ry na ongelukstonele en dan die slagveld en slagting waar te neem? Selfs ’n paar begeleide besoeke aan skrootwerwe sal opvoedkundig wees, al is die lyke en beseerdes verwyder. Dalk is daar ’n les in verwronge metaal. Niks is so opvoedkundig as noue blootstelling aan die werklikheid nie.
– Dr. B. de Wet, Danabaai
Kusdorpe moet woeker
Rapport se spotprent van 6 Januarie, wat wys hoe Tafelberg glimlag terwyl die Gautengers huis toe keer, tref die kol.
Sommige kusdorpe bly egter huiwerig om die Desembervakansie tot sy volle potensiaal te benut. Met ’n goeie sakeplan wat die “voete” besorg, kan al die kusdorpies gedy deur munt uit die somervakansie te slaan.
Stilbaai se stadsvaders slaag meesterlik hierin met die raakrugbytoernooi, die Trans-Agulhas-rubberbootwedvaart langs die hoofstrand, die kroning van ’n bierpens en ’n fraaie meisie en ’n lekker Oujaarsaand-vrolikheid.
– Reinhold Swart, Bellville
Vergewe tog
Ek lees die vele kommentare oor die vrylating van Riku Nortjé ná sy betrokkenheid by die tasmoord soveel jare gelede.
Ai, wat het van vergifnis geword?
Hoeveel van die mense wat kommentaar gelewer het, bid die Onse Vader?
Bid u dan nie “Vader, vergewe ons ons sondes soos ons ook ons sondaars vergewe” nie?
Wie is ons om te oordeel, te verpletter en seer te maak? Het u nog nooit ’n fout begaan nie? Het u nog nooit gesondig nie? As Christen vra ek: Gee die man ’n kans. Hulle het ’n ernstige misdaad gepleeg, ja, maar dit is hulle wat die gevolge moet dra van hul daad.
– Koos, per e-pos