- Artikelopsies
- Deel
- Kry Rapport op
Kerrie in vreemde allermins SA bobotie
deur Madri Jacobs, Durbanville
2012-09-02 00:13
In “Om te ontpit, nie te ontpit” (Rapport, 26 Augustus) wonder Marita van der Vyver wanneer ’n bobotie ophou om ’n bobotie te wees. Een van die antwoorde op haar vraag vind mens in Nederland.
Ek en my man het tot onlangs in Ouderkerk aan de Amstel, neffens Amsterdam, gewoon. Eendag is ons genooi vir ete en die gasvrou sit haar spogdis voor: Echte Zuid-Afrikaanse bobotie (uitgespreek: “bouboutie”). Die gereg, met groenboontjies wat punt in die wind staan, lyk allesbehalwe na bobotie.
So kom ons te wete dat ’n bekende kitssop-handelsnaam, wat hier ter plaatse ook al jare lank boks-kos maak, bobotie op die Nederlanders se borde gesit het. Die kruie- en sousmengsels kom uit ’n boks, maar gehakt (maalvleis), appels(!), sperziebonen (ons groenbone), crème fraîche en water moet bygevoeg word. Wie kan daardie Mrs Ball’s-advertensie vergeet waarin die Suid-Afrikaanse kelnerin “Mr and Mrs Ball” ’n stywe drukkie gee toe hulle by die grênd Britse restaurant opdaag? Met ’n soortgelyke gevoel van “tuiskoms” het ons die dag met smaak weggelê aan ’n heerlike kerriegereg. Ek het daarna sommer gou weer Kook en geniet opgediep en ’n behoorlike, bekoorlike bobotie gemaak. Met boontjies. As bykos.