- Artikelopsies
- Deel
- Kry Rapport op
Laat water provinsies bepaal
deur M. Pretorius, Totiusdal
2012-02-04 14:43
Met verwysing na LIzel Steenkamp se rubriek "Wees
eerlik oor minder provinsies", Rapport, 29 Januarie:
Die getal provinsies is nie belangrik nie. Wat wel belangrik is, is die
beplanning en balans van die provinsies of beplande gebiede. Indien die
beplanning sinvol gedoen word en die balans van die onderskeie elemente word
gehandhaaf behoort baie min probleme ondervind te word. Om sinvol te beplan
behoort daar besluit te word watter element die belangrikste is. In hierdie
waterskaars land is water seker die belangrikste element of, as 'n mens wil,
kommoditeit.
Indien dit die geval is behoort die waterbronne dus as die kern van 'n
streek gebruik te word en nie, soos so baie in die verlede as provisiale grense
nie. Die waterbronne word nie beskou as die fontein of vleiland waar dit
ontstaan nie maar die hele rivier van waar dit ontstaan tot waar dit in 'n
ander rivier of die see invloei. Die ander elemente soos landbou, intensief en
ekstensief, woongebiede, industrieë en alle ontwikkeling moet om die
hoofelemente, in die geval die waterbron, beplan word. Indien moontlik moet
selfs die bevolkingsgetalle hierby aangepas word.
Indien bogenoemde beplanningsbeginsel toegepas word sal die provinsiale
grense dus outomaties op die waterskeidings van die waterbronne geplaas word en
sal die waterbronne of dan die riviere, nie as grense van die provinsies wees
nie. Indien hierdie beplanningsmetode gebruik word kan dit deurgaans tot by die
kleinste streke toegepas word.
Indien hierdie metode toegepas word kan by die groter waterbronne of
riviere begin word, riviere soos die Oranje-, die Vaal-, die Tugela-, beide die
Krokodilriviere en beide die Olifantsriviere as provinsiale kerneenhede gebruik word.
Daar vandaan kan na kleiner eenhede beweeg word tot dit kleiner en meer
behartigbare eenhede skep.
Dat hierdie voorstel sy eie moeilikhede sal oplewer is baie seker. Veral
die industrieë sal waarskynlik die grootste opposisie wees en so ook die myne
wat op hierdie laat stadium die grootste bron van besoedeling is. Van ons
waterbronne is ook al totaal oorbenut soos bevoorbeeld die Vaalrivier en meeste
van ons riviere is ook reeds al te veel besoedel.
Indien ons nie nou begin op die land as 'n geheel behoorlik te beplan
nie en vas te stel hoe groot bevolking kan gerieflik in die land akkommodeer
word nie mag ons in die rigting van Indië en ander oorbevolkte lande
beweeg en die uiteinde daarvan mag
fataal wees - veral vir ons nageslagte.