- Artikelopsies
- Deel
- Kry Rapport op
Lamola sit ‘wit’ pot mis
deur J. Grobler, Centurion
2012-09-16 01:16
Ronald Lamola van die ANC-jeugliga het verlede week sy kommer daaroor uitgespreek dat al die Marikana-slagoffers swart was. “Waar was die wit mense?” wou hy weet.
En: “Hoekom is daar so min wit mense en Indiërs in studente-organisasies?”
As hy egter terugkyk oor die laaste jare se uitlatings deur hom en sy strydlustige makkers sal hy die antwoord daar vind. Hulle moedig rasonverdraagsaamheid, haatspraak, geweld en anargie aan. Dit kulmineer in protesaksies wat lewensverlies en skade veroorsaak en kweek rassisme en polariseer die reënboognasie waarna hy verwys.
Lamola sit ook die spreekwoordelike (huts-) pot mis as hy dink dat dit net wit en Indiër-studente is wat studente-organisasies vermy. Geen intelligente, verantwoordelike en wetsgehoorsame jong mens wil betrokke wees by geweld nie, ongeag hul ras, geslag kultuur en politieke affiliasie.
In dieselfde asem babbel Lamola voort: “The ruling class is still dominated by white people...”
En: “The ongoing inequality in the economy is preventing the country from becoming a true rainbow nation because white males are in control.”
Watter “ruling class” sou dit wees, wonder ek.
Want die komplekse struktuur van die “heersende klas” in Suid-Afrika is lankal nie meer net wit nie. En sover ek weet word dit maar alte deeglik verteenwoordig deur die vermoënde lede van die ANC.