- Artikelopsies
- Deel
- Kry Rapport op
Lees Sondagkoerant nou Maandae ook
deur André Visser, per e-pos
2012-07-07 14:35
Op 17 Junie het Rapport die eerste keer op die voorblad van die elektroniese koerant die lesers daarop gewys dat sekere berigte daardie dag net in die gedrukte Rapport verskyn.
Dan het Rapport genoem waaroor daardie berigte gaan.
Natuurlik het die mense gebrand van nuuskierigheid. Wie sal nie wil weet waaroor dit gaan as jy ’n nuusverslaafde of ’n wil-weet-verslaafde is nie?
Baie kommentators het onderaan Rapport se berig gal gebraak dat die biesies bewe.
Die volgende oggend, Maandag 18 Junie, gaan kyk ek so net ná 09:00 op Rapport se webwerf op die internet en ja, daar is daardie berigte (onder meer die een oor die Suid-Afrikaanse volkslied) almal bygewerk.
Dat geeneen wat kommentaar gelewer het dit agtergekom het nie, het my verbaas. Nog te meer die volgende Sondag toe die mense weer gal braak en Rapport uitkryt en name noem.
Die volgende dag, Maandagoggend vroeg al, was daardie berigte ook al weer bygewerk.
Ek weet van baie mense wat in elk geval eers Maandae deur die loop van die dag die Sondag se elektroniese weergawe van die koerante lees.
So weet hulle nie eens van die omstredenheid en geskarrel wat dit die vorige dag by die mense ontlok het nie.
Ek het nogal groot geglimlag toe een van die ouens die Sondag onderaan die kennisgewing op die voorblad geskryf het dat al die eksemplare van Rapport daar in sy woonbuurt aan die Wes-Rand al deur die loop van die Sondagoggend uitverkoop was.
100% vir Rapport!
Ek lees nou my Rapport Sondae én Maandae.