- Artikelopsies
- Deel
- Kry Rapport op
Maties-swembad nie Olimpiese grootte
deur Jansie Jonker, Stellenbosch
2012-07-14 16:01
Ek wil net reageer op die berig van Sondag 8 Julie oor Stellenbosch-sport en dan in die besonder oor die “lekkende Olimpiese swembad”.
Eerstens is die buite-swembad, wat al twee jaar leegstaan, nie ’n 50 m-Olimpiese swembad nie, maar het ’n afmeting van 33 m. Hierdie swembad is dus ook nie geskik vir Olimpiese swemmers om in te oefen nie. As ’n swemmer op die hoogste vlak meeding, is dit noodsaaklik dat hy/sy in die regte grootte bad oefen. Dit was vir die vyf Matie swemmers wat Olimpiese en Paralimpiese Spele toe gaan ’n groot frustrasie. Heerden Herman, wat 1 500 m swem, moes selfs in Durban gaan oefen.
Die universiteit beskik het ook ’n 25 m-swembad binne, maar dié swembad is primêr ’n “klaskamer” vir Sportwetenskap-studente. Die ander swem-aktiwiteite moet daar rondom aangepas word, wat oefentyd vir Olimpiese en selfs ons nasionale swemmers baie beïnvloed.
Ek weet watter frustrasies dit baie dae was vir die swemmers en hul afrigter, Pierre de Roubaix. Hulle moet gelukgegewens word met die manier waarop hulle die situasie gehanteer het en wat hulle vermag het.
Ons kan waarlik trots wees op hulle.
Ek is al langer as 20 jaar betrokke by die Matie Swemklub en het die volste vertroue dat die universiteit se bestuur nou daadwerklik aandag aan hierdie probleem sal gee.