- Artikelopsies
- Deel
- Kry Rapport op
Opposisie moet SA red
deur Dr. Ivan Meyer, Wes-Kaapse minister van kultuur en sport
2012-09-09 01:16
So twee weke gelede was daar ’n debat in die Wes-Kaapse wetgewer oor die ANC se ondermyning van die hoekstene van ons demokrasie.
Daar is oorweldigend saamgestem dat die ANC die Grondwet en eed van die president ondermyn (sien Eight Days in September deur Frank Chikane).
Hierdie is gevaarlike tekens wat daarop wys dat die party geen belang het om ons grondwetlike demokrasie te beskerm nie. Daar is ook toenemende bewyse dat die Suid-Afrikaanse regering, onder die leiding van die ANC, die volgende beginsels ondermyn: reg en orde; die onafhanklikheid van die regstelsel; oop en deursigtige regering; menseregte; staatsinstellings (antikorrupsie-agentskappe); goeie regering; en individuele vryheid van spraak.
Wat nou nodig is, is dat ons ons veldtogte verskerp deur ’n veelparty-ooreenkoms om ons Grondwet en Suid-Afrika te beskerm voordat dit te laat is. Die ANC val vinnig uitmekaar en is nie in staat om die land te regeer nie. Die gebeure by Marikana was ’n wekroep vir Suid-Afrikaners.
Opposisiepartye moet die stem en aksie word wat ons grondwetlike demokrasie beskerm.