- Artikelopsies
- Deel
- Kry Rapport op
Passie vir rugby koel af oor dié gestoeiery
deur Koos van der Merwe, LP
2012-09-16 01:16
My passie vir rugby is aan die afkoel. Ek het self eerste liga in Pretoria en Noord-Transvaal- proewe gespeel en kyk rugby van kindsbeen af.
Waarom dan die afkoeling?
Die volgende dreineer my rugbypassie:
1. Rugby se grootste kenmerk vandag is ’n moerse gestoei.
2. Laagvatte bestaan omtrent nie meer nie. Ouens word om die lyf gegryp en soms om die nek.
3. Wat maak die voorspelers in die agterlyn? As ’n buitesenter probeer breek, loop hy hom in ’n paar voorspelers vas.
4. Ons speel nou stormramrugby: Twee of drie bondel saam en storm dan reg in die opponente in wat op hulle staan en wag en dan stoei hulle en stoei en stoei.
5. Wedstrydplanne is heeltemal voorspelbaar: Veral die paar voorspelers wat keer op keer die opponente stormram. Vervelig is die woord.
6. Waarom word so diep afgeskop? Jou spelers kom elke keer te laat by die bal en die opponente behou dan besit. As jy vlakker afskop, kan jou spelers baie keer die bal kry.
7. Aanhoudende bevele van die afrigters af: Kyk gerus op TV hoe afrigters te kere gaan, op radio’s bevele uitskree en jou laat wonder wanneer kry die arme man ’n hartaanval.
Nee wat. Ons ou manne huil oor die lekker ou rugby wat verby is – toe jy oop rugby gesien het. Manne wat die hele veld vol gespeel het.
Toe die enigste beloning wat jy ná ’n harde wedstryd gekry het, jou eie bevrediging was. O ja en ’n halwe lemoen rustyd.
Dit was heeltemal genoeg vir iemand wat lief vir rugby was.
Daardie dae was groot.