- Artikelopsies
- Deel
- Kry Rapport op
Potch wys politieke rigting aan
deur Dr. Pieter Mulder, VF+-leier
2012-12-02 00:19
Die Potchefstroomse oorwinning van opposisiepartye oor die ANC, hoewel net tydelik, illustreer die politieke opsies vir die toekoms.
Die belangrikste voorwaarde vir so ’n toekomstige sukses is om die regte resep vir samewerking te kry. In Potchefstroom is ’n DA-burgemeester verkies met ’n meerderheid van 20 teenoor 19. Die VF+ se twee stemme het die verskil gemaak.
Op ’n onlangse vergadering van opposisiepartye in Durban het ek weer eens besef hoe ingewikkeld die Suid-Afrikaanse politiek is.
Ek was die spreker saam met dr. Mangosuthu Buthelezi (IVP), Mosiuoa Lekota (Cope), Lindiwe Mazibuko (DA), dr. Kenneth Meshoe van die ACDP en ander leiers. In die geesdriftige gehoor was ondersteuners van al dié partye, die meerderheid IVP-lede. Hulle het dit duidelik gemaak dat hulle anti-ANC is, maar ook vir geen ander party as die IVP sal stem nie. Op dieselfde wyse het die ACDP’s aan my verduidelik hoe belangrik hul beginsels vir hulle is. Hulle wil anti-ANC maar pro-ACDP kan stem. As hierdie IVP- of ACDP-ondersteuners gedwing word om vir die DA, die VF+ of ’n nuwe eenheidsparty te stem, gaan hulle buite stemming bly.
Ons kiesstelsel is ontwerp om te keer dat een party alleen al die mag het. Die fout by Kodesa was om te dink die ANC gaan van die begin af minder as 50% kry. In Europa kry die sterkste partye so 40%. Dan moet dié party met ander partye saamwerk om 50% te kry. Die ANC gaan iewers in die toekoms van hul huidige 65% tot minder as 50% sak. Dan is dit belangrik dat opposisiepartye verantwoordelik saamwerk.
Die regte wenresep, soos in Potch, is een wat dit vir kiesers moontlik maak om téén die ANC te stem, maar steeds ook vir hul voorkeurparty.