- Artikelopsies
- Deel
- Kry Rapport op
Revolusie, en Nkandla brand...
deur Izak Bergh, Marchand
2012-10-20 23:51
Die ANC-regering bly vir my ’n enigma. ’n Eeu lank het hierdie vryheidsbeweging ’n struggle gevoer teen ongelykheid en diskriminasie deur die minderheidsgroep wit mense.
Van hul leiers was hoogs morele mense van onkreukbare karakter. Toe selfs die meeste wit Suid-Afrikaners die onreg erken en sonder slag of stoot die mag oorgee, het daar ’n golf van euforie en optimisme oor die land gespoel.
Die wit mense was verlig dat die albatros van apartheid van hul nekke af was en dat hulle die beskaafde wêreld in die oë kon kyk. Die voorheen benadeeldes het gejubel, want die kettings was los. Spoedig egter het ons drome in nagmerries ontaard.
Behalwe dat hulle oorweldig was deur hul nuutverkreë mag, het hulle ook nie ’n ervare, gevestigde burokrasie gehad nie. Ook was daar talle vrybuiters sonder integriteit wat begin plunder het.
’n Nuwe, gewetenlose struggle om mag en rykdom het versprei. Die beweging se beginsels, edele motiewe en hoë ideale het weggesink in ’n moeras van korrupsie aangedryf deur mag- en hebsug.
Wat onverstaanbaar is, is die onvermoë van die leierskorps om te besef dat as die staat misluk (en ons is op pad daarheen) sink hulle saam met die res. Hulle trek eerder laer om hul beskermheer, Jacob Zuma.
Nog erger is die moontlikheid van ’n gewelddadige revolusie met Nkandla in vlamme.