- Artikelopsies
- Deel
- Kry Rapport op
Slaap rustig in PW se bed
deur Cliff Saunders, Northcliff
2010-03-13 15:25
Rapport se spotprent verlede Sondag van mnr. Sango Ntsaluba (eienaar van Die Anker) wat in sy bed lê en bewe van angs omdat die “spook” van PW Botha glo daar ronddwaal, het my laat terugdink aan die aand ná PW se begrafnis toe sy vrou, Barbara, vir my sê: “Jy kan maar in PW se bed slaap vanaand. Jy’s die eerste persoon wat dit gaan doen noudat hy dood is!”
Die aand voordat ek die lig afgeskakel het, het ek onwillekeurig gedink aan die aand wat ek in Stalin se dacha (vakansiehuis) by die Swart See deurgebring het.
’n Mens kon die euwel en boosheid van die “moordenaar van miljoene” se plek aanvoel.
My kollega Lehana Tsotetsi en ek moes eers ’n halwe bottel whisky uitdrink voordat ons kon slaap en Lehana het sy lig dwarsdeur die nag laat brand.
Aangesien ek 12 jaar gelede opgehou drink het, het ek sonder “troos” die lig in PW se kamer afgesit en gewag om te sien/hoor of iets “gebeur”.
Niks! Ek het soos ’n lammetjie geslaap.