- Artikelopsies
- Deel
- Kry Rapport op
Solidariteit mislei met Woolworths
deur Taliep Katgriep, Johannesburg
2012-09-09 01:16
Solidariteit se veldtog teen Woolworths se sogenaamde “diskriminasie” teen wit mense is besig om te ontaard in ’n massa-histerie en is totaal ongegrond.
Dié vakbond is besig om oningeligte mense te mobiliseer om sy eie agenda te bevorder – ’n taktiek wat sterk herinner aan wat die ANC graag doen, en waarvan Solidariteit die party graag beskuldig.
Die feit van die saak is dit: Woolworths se topstruktuur is oorwegend wit.
Sy werknemers wat die winkels beman, is oorwegend swart.
Dit strook nie met die Suid-Afrikaanse demografie nie en die winkelgroep probeer dit regstel, ingevolge die land se bemagtigingswetgewing.
Enige groot maatskappy wat nie dié wet nakom nie, is in die moeilikheid.
Woolworths se mededingers het presies dieselfde teikens en pas die wet op presies dieselfde wyse toe.
Maar sedert Solidariteit besluit het dat Woolworths die groot sondebok is, word trollies vol gelaai en dan net so in die winkels gelos.
Solidariteit vra mense om foto’s te neem van Woolworths se kassiere om vas te stel hoeveel van hulle kwansuis wit is.
Iemand vertel my hy boikot Woolies omdat hulle “al die wit mense gaan afdank”.
Solidariteit wend ook geen poging aan om rassistiese en oningeligte opmerkings op sy Facebook-blad te verwyder of selfs aan te spreek nie.
Hierdie soort optrede is aspris, ondeurdag en onnodig.
Solidariteit se pogings om gelykheid in die werkplek te bevorder is meestal prysenswaardig, maar hierdie veldtog is ’n studentikose boelie-taktiek wat Woolworths die skuld probeer gee vir sekere wit mense se ontnugtering met die uitdagings van post-apartheid Suid-Afrika.