- Artikelopsies
- Deel
- Kry Rapport op
Suidlanders het nie bande met ‘regse nes’
deur Johann le Roux, onderleier: Suidlanders
2009-12-19 18:57
Die berig “Regse nes gekry” (Rapport, 13 Desember) het betrekking. Daarin word berig dat die Suidlanders “noue bande” het met die Jesurun-beweging. Die Suidlanders dra geen kennis van die Jesurun-beweging nie en het nog nooit enige amptelike gesprekke met die groep gevoer om enige samewerking te bespreek nie.
Ook word beweer dat die Suidlanders “Vrydag” met die Jesurun-beweging sou “vergadering hou”.
Net die nasionale leier en onderleier mag met ander organisasies vergader namens die Suidlanders en albei was in Pretoria tydens dié tydperk en sou dus geensins so ’n vergadering kon bywoon nie. Die provinsiale bestuurder in die Wes-Kaap het ook geen kontak gehad met die groep nie en dra geensins kennis van enige geskeduleerde of ander vergadering met die groep nie.
Daar bestaan ook geen samewerking met die “Boeremag” nie. Die Suidlanders het ontstaan nadat die “Boeremag” reeds gevange geneem is.
Die Suidlanders het hulself nog altyd in die openbaar en deur middel van amptelik opgestelde beleid en per deklarasie uitgespreek teen geweld of enige verbreking van die landswette. Voorts is die Suidlanders nie ’n politiek-gedrewe organisasie nie, maar eerder ’n groep bekommerde persone wat saamwerk om mense se veiligheid te verbeter in ’n land waar reg en orde daagliks agteruitgaan. Dit is duidelik in amptelike statistieke en mediaberigte dat Suid-Afrika nie ’n veilige land is vir enige van sy burgers nie.
Daarom beywer die Suidlanders hulle om mense bewus te maak van die gevare in die samelewing en om planne binne die wette van die land voor te stel om mense aan te moedig om self verantwoordelikheid te neem vir hul eie veiligheid en voortbestaan in Suid-Afrika.
Die nasionale bestuur van die Suidlanders sowel as ons ondersteuners voel dat die Suidlanders erg te na gekom is met die publikasie van die berig en dat dit die organisasie skade berokken het.