- Artikelopsies
- Deel
- Kry Rapport op
TV-program het in dié konteks geen betekenis
deur Terblanche Jordaan, Renaissance Gemeente: Kaapstad
2010-03-13 15:25
Mag ek iets sê oor Die ander kant (kykNET) en sekere Christene se reaksie daarop:
* Ek vind dit verstommend dat die “versoekskrywers” van die tros-pos die moed het om uit Levitikus aan te haal. In die Bybel staan daar ook onder meer dat ’n ongehoorsame kind ’n gruwel is in die oë van God en by die stadspoorte gestenig moet word (Deut 21:18-21). Nou wil ek vra: Sal dié Christene of dominees ons help om ons “ongehoorsame kinders” te stenig?
Wie gaan elke meisie wat trou wat nie ’n maagd is nie by die stadspoorte met klippe doodgooi (Deut 22:21)? Haar ouers of die mans wat nie maagde is nie? En so kan daar honderde voorbeelde uit Levitikus en Deuteronomium genoem word.
* Ek vind dit hartseer dat ons dink God is in ’n “oorlog” met ’n satan en God staan ’n kans om die “oorlog” te verloor – daarom wens ek met my hele hart dat Christene sal besef: Alle krag kom van God en as dit nie van God kom nie, het dit hoegenaamd géén krag nie!
* Laastens vind ek dit aanmatigend (naïef-arrogant) dat ons as mens dink ons kan God aanstoot gee op enige manier.
Het God dan ’n ego wat ’n tantrum gooi omdat ’n program soos Die ander kant uitgesaai word op ’n TV-kanaal in Suid-Afrika?
Nee, nee, nee – kom ons kies ’n groter weergawe van God en nie die god wat ons in ’n geut van ons eie projeksies, agterdog, wanopvattings en bowenal vrees wil druk nie. Ons het mos ’n keuse (’n wonderlike geskenk van ’n liefdevolle God) om te sê: “Ek wil nie die program kyk nie”, want elke TV kom tog met ’n knoppie wat jy aan of af kan sit, of nie?
In vadersnaam – kom ons begin God dank met blydskap – want dankbaarheid ontsluit die krag van God! Laat ons ophou murmureer oor ’n TV-program wat in die konteks van “ewigheid” en die almagtige, alomteenwoordige, alwetende God – géén betekenis het.