- Artikelopsies
- Deel
- Kry Rapport op
Verkeerde indruk oor forum
deur Daryl Swanepoel, PBF
2012-02-04 14:43
In Rapport van 29 Januarie word oor partypolitieke finansiering in Suid-Afrika geskryf, met ’n aantal onakkurate stellings wat die verkeerde indruk van die ANC Progressiewe Besigheidsforum (PBF) se werk wek.
So word daar gesê: “Vir ’n aansienlike som kan ’n mens PBF-lidmaatskap koop, wat beteken dat jy genooi word na byeenkomste met ANC-leiers wat toevallig ook regeringsdepartemente lei en beleid formuleer... In Suid-Afrika het dit ’n beduidende bron van inkomste vir die ANC geword.” Só gestel, klink dit of die ANC op ’n geldbron afgekom het wat dit opsluit gaan benut, of dit nou eties is of nie.
Daar is egter niks sinister in nie: Die tariewe word wél op ons webtuiste geadverteer – tot R7 500 per jaar vir die afdeling vir klein, middelslag- en mikro-ondernemings en ietwat meer vir groter maatskappye. Kwalik beduidende bedrae en allermins bedrae wat enigiemand tot korrupsie sal oorhaal.
PBF-deelnemers besef die waarde van tweegesprek. Veral in ’n ontwikkelende land soos ons s’n, met sy reuse-uitdagings, is dit belangrik vir korporatiewe Suid-Afrika en die ANC om oor die ekonomie te praat.
Die bewering dat die PBF sy lede op staatsbeheerde en staatsgefinansierde handelsmissies saamnooi, is eenvoudig onwaar.
Die PBF reël, en sy deelnemers betaal self, hierdie handelsmissies; trouens, die PBF dek selfs die uitgawes van die ANC-minister wat die missie vergesel.
Kritici erken dat partye geld moet werf om doeltreffend te funksioneer – soos in enige moderne demokrasie. Diegene wat hierdie praktyk kritiseer, kan gerus laat weet hoe partye “eties” geld kan insamel.