- Artikelopsies
- Deel
- Kry Rapport op
Verregses skaad Afrikanerbeeld
deur Pienk Vlooi
2012-12-30 05:03
'n Minderheid binne 'n minderheid: Hoe effektief is die regses om vir Afrikaners 'n toekoms te verseker?
Al wat die verregses regkry, is om 'n karikatuur van die Afrikaner te maak met byvoorbeeld die lawwe kaskenades van die sogenaamde Boere-ninja waaroor Rapport laas Sondag berig het.
As ek as Afrikaner na my eie kring van vriende en familielede kyk, is diegene wat ontevrede en selfbejammerend is oor hul posisie in Suid-Afrika in die minderheid. Verreweg die meeste Afrikaners na-aan my gooi hul gewig agter die vooruitgang op alle vlakke van die groter Suid-Afrikaanse samelewing.
Hulle neem voluit deel aan die ekonomie en arbeidsmag in Suid-Afrika. Hulle dien ook die gemeenskap deur werkskepping, liefdadigheid, wetsgehoorsaamheid en respek vir alle mense – sonder om hul eie taal en kultuur prys te gee.
Hulle mors nie tyd en energie met 'n voortdurende gekerm en gekla nie.
Die probleem is dat hardwerkende, goedgesinde Afrikaners nie soveel aandag trek soos die ekstremiste wat gedurig in die openbare oog is met hulle negatiewe gedrag en uitsprake nie. Dit lei helaas daartoe dat beskaafde Afrikaners in toenemende mate nie geassosieer wil word met hierdie skandemakers nie.
As ek een wens vir 2013 het, is dit dat Afrikaners trots hul plek sal bly volstaan in Suid-Afrika.