- Artikelopsies
- Deel
- Kry Rapport op
Verwerp eerstens dié geweld
deur Jan Venter, Bloemfontein
2012-10-07 01:25
Ebrahim Fakir se artikel “Moslems vra regverdigheid” (30 September) verdien almal se ondersteuning.
Dit is ’n geldige versoek, iets waarna gestrewe moet word.
Maar dis eweneens nie onredelik om te verwag dat aan sekere minimum standaarde voldoen moet word voordat jy daardie reg aan jouself toeëien nie.
Suid-Afrika het tydens die apartheidsjare hom vergeefs daarop beroep. En na regte so; ons het deur isolasie ’n dure prys vir daardie beleid betaal.
Wat die beledigende fliek betref, is dit reg om te verwag dat die beskaafde wêreld aan albei kante van die “skeiding” dit ten skerpste moes veroordeel, soos tereg gedoen is.
Maar wat meer moes die “owerhede in die Weste” doen? Die fliek sensor of verbied? Dit kan tog nie in ’n wêreld van vrye spraak werk nie.
Want waar word die streep getrek en deur wie? Soortgelyke beledigende flieks is teen die Christendom gemaak, maar Christene het nie onskuldige mense daaroor vermoor nie.
Om hierdie “gebrek” aan drastiese optrede deur die Weste egter gelyk te wil stel aan die moorddadige optrede van “die gewelddadige Moslems” is nie die wyse waarop die regverdigheid wat bepleit word, verkry kan word nie. Inteendeel!
Natuurlik moes die fliek nooit gemaak gewees het nie, maar duisendmaal meer moes mense nie daaroor vermoor word nie. ’n Eerste stap sou wees dat alle Moslems dié wreedhede sonder voorbehoud veroordeel.
Die finale stap sou wees om alle sodanige gewelddadige optredes summier te staak. Eers dan is gelyke en regverdige behandeling moontlik.